Inson organizmining imkoniyatlari hali to‘liq kashf etilmaganiga yana bir dalil paydo bo‘ldi. Xitoylik olimlar inson tanasidan chiqadigan issiqlikdan elektr energiyasini olish imkonini beruvchi yangi texnologiyani namoyish etdi. Bu haqida “South China Morning Post” nashri ma’lum qildi.
Mutaxassislar “termoelektr kauchuk” deb nomlangan elastik materialni yaratishdi. U yarimo‘tkazgichli polimer va kauchuk asosida ishlab chiqilgan bo‘lib, inson tanasi haroratini elektr quvvatiga aylantiradi.
Olimlarning fikricha, bu material yaqin kelajakda hayotimizda katta o‘zgarishlar yasashi mumkin. Masalan, aqlli soat yoki quloqchinlarni maxsus rozetkasiz, faqat tana issiqligi orqali zaryadlash mumkin bo‘ladi. Shuningdek, elektr tarmog‘i mavjud bo‘lmagan sharoitlarda telefon yoki boshqa gadjetlarni quvvatlantirishda qo‘l kelishi ehtimol qilinmoqda.
Texnologiyaning qo‘llanish sohasi faqat shu bilan chegaralanmaydi. Olimlar kelgusida mazkur materialni “aqlli kiyimlar”ga integratsiya qilishni rejalashtirmoqda. Bunday kiyimlar nafaqat gadjetlarni quvvatlaydi, balki inson tanasi haroratini ham muvofiqlashtirishga yordam berishi mumkin.
Qizig‘i, materialga turli sensorlarni joylash imkoni ham bor. Buning natijasida u bosimni o‘lchash, kimyoviy moddalar tarkibini aniqlash yoki nafas olish jarayonini kuzatish kabi vazifalarni bajaradi. Mutaxassislar aytishicha, bunday sensorlar nafaqat salomatlik monitoringida, balki viruslarni aniqlash yoki o‘pka saratoni tashxisida ham qo‘llanishi mumkin.
Xitoy tadqiqotchilari ta’kidlashicha, bu material asosida yaqin kelajakda aqlli niqoblar ham ishlab chiqilishi mumkin. Ular insonning nafas olish tizimini kuzatish bilan birga, turli kasalliklarni erta bosqichda aniqlashga yordam beradi.
Shu tariqa, “termoelektr kauchuk” nomli ushbu kashfiyot energiya manbalariga yangi qarash olib kirishi va sog‘liqni saqlash sohasida ham yangi imkoniyatlar eshigini ochishi mumkin.
“Zamin”ni Telegramʻda oʻqing!
