Jahon sog‘liqni saqlash tashkiloti ma’lumotlariga ko‘ra, dunyoda har oltita o‘limdan biri saraton kasalligi hissasiga to‘g‘ri keladi. Shu bois bu xastalikni chuqur o‘rganish, uning sabablarini tahlil qilish va erta aniqlash bo‘yicha yirik loyihalarga katta mablag‘ yo‘naltirilmoqda, deb yozdi “The Lancet Oncology” nashri.
Tahlillarga ko‘ra, 2016–2023 yillar oralig‘ida butun dunyoda saraton kasalliklarini o‘rganish uchun jami 51,4 milliard yevro qiymatidagi 108 mingta grant ajratilgan. Unda davlat mablag‘lari va xayriya tashkilotlarining hissasi inobatga olingan, ammo xususiy sektor sarf-xarajatlari hisobga olinmagan.
Qaysi davlatlar yetakchi?
AQSH — global mablag‘larning 57 foizi (25,2 mlrd yevro)
Yevropa Ittifoqi davlatlari — 16,8 foiz (7,4 mlrd yevro)
Buyuk Britaniya — 11,1 foiz (4,9 mlrd yevro)
Yaponiya — 3,6 foiz (1,6 mlrd yevro)
Avstraliya — 2,9 foiz (1,3 mlrd yevro)
Kanada va Xitoy — 2,6 foizdan (1,3 mlrd yevro)
Aniqlanishicha, AQSH saraton tadqiqotlariga eng ko‘p mablag‘ yo‘naltirib kelayotgan yagona mamlakat sifatida yetakchilikni saqlab turibdi. Biroq, Yevropa davlatlari ham milliardlab yevro ajratib, bu yo‘nalishda salmoqli hissa qo‘shgan.
Qashshoq mamlakatlar nega ortda qolmoqda?
Tadqiqotga ko‘ra, ajratilgan mablag‘larning asosiy qismi boy davlatlar hissasiga to‘g‘ri keladi va ularning katta qismi o‘z ichki loyihalariga yo‘naltirilgan. Shu bilan birga, rivojlanayotgan mamlakatlar bu yo‘nalishga atigi 48,4 million yevro ajratgan xolos.
Qaysi sohalarga ko‘proq mablag‘ ketmoqda?
Ajratilgan mablag‘larning 76 foizi laboratoriya tadqiqotlariga sarflangan. Ayniqsa, ko‘krak bezi saratoni va qon saratoni kabi ko‘p tarqalgan turlarni o‘rganish, shuningdek klinik sinovlarni moliyalashtirish alohida ustuvorlikka ega bo‘lgan.
Mutaxassislar ta’kidlashicha, bunday yirik sarmoyalar nafaqat yangi dorilar yaratish, balki kasallikni erta aniqlash va uning oldini olishda ham muhim ahamiyatga ega.
“Zamin”ni Telegramʻda oʻqing!
