AQSHning Nevada cho‘lidagi mashhur “Burning Man” festivalida noodatiy voqea sodir bo‘ldi — yosh oila o‘zlarining treylerida kutilmagan tarzda qiz farzandli bo‘ldi. Ayol hatto homiladorligini ham bilmagan. Bu haqda Pravilamag xabar berdi.
Kayla Tompson ismli festival ishtirokchisi jurnalistlarga 27 avgust kuni eri bilan treylerda tunab qolganini aytgan. Kutilmaganda qattiq og‘riq sezilgan va oradan ko‘p o‘tmay u hammomda 1,6 kilogramm vaznli qizaloqni dunyoga keltirgan.
Kaylaning ta’kidlashicha, homiladorlik davomida u hech qanday “homiladorlik belgilar”ni sezmagan va hatto farzand ko‘rish haqida o‘ylashmagan ham.
Tug‘ruqdan so‘ng er yordam so‘rab yugurib chiqqan va festival qatnashchilari orasidan hamshira-doya, pediatr va ginekologni topishga muvaffaq bo‘lgan. Ular birinchi yordam ko‘rsatishganidan keyin ona-bola dastlab festivalning tibbiy markaziga, so‘ngra Renodagi shifoxonaga olib ketilgan. Qizaloq vertolyotda, onasi esa mashinada yuborilgan — er-xotin bu qarorni “eng og‘ir lahzalardan biri” deb eslashdi.
Kaylaning aytishicha, shifoxonadagi hamshiralar ham unga “tug‘ruq qilgan ayolga o‘xshamaysan” deb hazillashishgan.
Festival tashkilotchilari esa Tompsonlar oilasini tabriklab, bayonot berishdi:
“Shamol, jazirama va qum bo‘ronlariga qaramay, ular Qora Rok Sitida yangi hayotga yo‘l ochishdi. 'Burning Man'da nishonlaydigan eng muhim qadriyatlarimiz — hayot, aloqa, o‘zgarish va quvonchdir”.
“Zamin”ni Telegramʻda oʻqing!
