Turkiston viloyatidagi Qozog‘istonning "Sayram-Ugam" milliy bog‘ida olib borilgan qidiruv-qutqaruv ishlari yakunlandi. Sayyohlardan biri - O‘zbekiston fuqarosi halok bo‘ldi, uning hamrohi esa omon qoldi, deb yozadi "Kursiv media."
Qidiruv ishlari 2 ming metr balandlikdagi tog‘larda olib borildi. Qarindoshlarining 1-sentyabr kuni ma’lum qilishicha, 1996 va 1997-yillarda tug‘ilgan ikki yigit 31-avgust kuni Chimkentdan sayohatga chiqqan, shundan so‘ng ular aloqaga chiqmay qo‘ygan.
Avvaliga qutqaruvchilar vertolyotni jalb qilishga uringan, biroq havo texnikasi xavfli hududga yetib bora olmagan. Shundan so‘ng guruh yo‘lni piyoda davom ettirdi. Alpinistlar federatsiyasining tajribali xodimlari yordamga chaqirildi va aynan ularning yordami bilan sayohatchilarga yetib borishga muvaffaq bo‘lindi.
Tirik qolgan yigit otdan tushirilib, qarindoshlariga topshirildi. Marhumning jasadi alohida ajratib olinib, politsiyaga topshirildi.
“Zamin”ni Telegramʻda oʻqing!
