Qozog‘istonning Olmaota shahrida sodir bo‘lgan g‘ayrioddiy holat butun ijtimoiy tarmoqlarda katta muhokamalarga sabab bo‘ldi. Ma’lumotlarga ko‘ra, mahalliy bloger mashhurlikka erishish va obunachilar sonini ko‘paytirish maqsadida aql bovar qilmas tajribaga qo‘l urgan — u o‘zini tiriklay qabrga ko‘mdirib, jonli efir olib borgan. Bu haqida “Nur.kz” xabar tarqatdi.
Shahar aholisi va onlayn foydalanuvchilarning aytishicha, bloger avval do‘stlari bilan maxsus o‘ra qazdirgan. Keyin u o‘sha o‘raga tobut qo‘ydirib, ichiga o‘zini yotqizgan. Do‘stlari esa uning roziligi bilan qabrga qo‘yib, tobut og‘zini berkitishgan. Jonli efir orqali tarqatilgan bu manzara qisqa vaqt ichida keng jamoatchilikka yetib bordi.
Ko‘pchilik bu harakatni keskin qoralab, “shuhratparastlik odam hayotidan ustun kelmasligi kerak” degan fikrlarni bildirdi. Ijtimoiy tarmoqlarda tarqalgan izohlarda “odam hayoti xavf ostida qolgan holda efirga chiqish aqlga to‘g‘ri kelmaydi, politsiya bunday harakatlarga qarshi chora ko‘rishi shart” degan chaqiriqlar yangradi.
Olmaota shahar politsiyasi ham bu holatdan bexabar qolmadi. Rasmiy ma’lumotda aytilganidek, voqea yuzasidan tekshiruv boshlangan va qonunchilikka muvofiq tegishli choralar ko‘rilishi belgilangan.
Mutaxassislar esa bu kabi holatlarni jamiyat uchun xavfli tendensiya sifatida baholamoqda. Chunki shuhrat va ommaviy e’tibor izlab qilingan bunday ekstremal harakatlar yoshlar ongiga salbiy ta’sir ko‘rsatishi, hatto ularni turli xavfli “chellenj”larga chorlab qo‘yishi mumkin.
Jamoatchilik fikriga ko‘ra, bu voqea nafaqat bir blogerning ishi, balki ommaviy axborot maydonida mas’uliyatsizlikning qay darajaga chiqqani haqida ham jiddiy signal bo‘lib xizmat qiladi.
“Zamin”ni Telegramʻda oʻqing!
