Shri-Lankaning janubiy hududida yuz bergan yo‘l-transport fojiasi butun mamlakat jamoatchiligini hayajonga soldi. Adaderana portali tarqatgan xabarga ko‘ra, 4 sentyabr kuni kechqurun Ella shahri atrofida yo‘ldan chiqib ketgan avtobus 150 metr chuqurlikdagi jarlikka qulagan.
Rasmiy ma’lumotlarga ko‘ra, avtobusda haydovchi bilan birga 30 nafar yo‘lovchi bo‘lgan. Achinarlisi, hodisa oqibatida kamida 15 kishi jon taslim qilgan. Jabrlanuvchilar orasida Tangalle kurort shaharining shahar kengashi a’zolari ham borligi aytiladi.
Politsiyaning dastlabki ma’lumotlariga ko‘ra, transport vositasi katta yo‘ldan chiqib ketishi natijasida bu halokat yuz bergan. Qutqaruv guruhlari va tibbiyot xodimlari hozirda hodisa joyida ish olib borishmoqda, tirik qolganlarni qutqarish va jarohatlanganlarga yordam ko‘rsatish ishlari davom etmoqda.
Mutaxassislar bunday holatlar Shri-Lankaning tog‘li hududlarida yo‘l infratuzilmasi va xavfsizlik choralarini kuchaytirish zarurligini yana bir bor eslatib qo‘yganini ta’kidlashmoqda. Chunki yo‘llardagi e’tiborsizlik yoki texnik nosozliklar ko‘p hollarda inson hayotiga og‘ir tahdid soladi.
Jamoatchilik bu fojiani katta qayg‘u bilan qarshi oldi. Mahalliy ommaviy axborot vositalari voqeani mamlakatning so‘nggi yillardagi eng dahshatli yo‘l halokatlaridan biri sifatida qayd etmoqda.
“Zamin”ni Telegramʻda oʻqing!
