Buyuk Britaniyada tarixiy jihatdan g‘oyat muhim topilma aniqlandi. Arxeologlar Gloster shahridagi sobiq Debenhams univermagi o‘rnida qazish ishlarini olib borish jarayonida 317 ta inson skeletini topishdi. Bu haqida Popular Mechanics nashri yozdi.
Ma’lumotlarga ko‘ra, hozirda ushbu hududda Gloster universitetiga tegishli yangi kampus qurilayotgani bois arxeologik tadqiqotlar o‘tkazilgan. Qazishmalarni Cotswold Archaeology tashkiloti amalga oshirgan. Ular avvalroq shu yerda Rim davriga oid yana 80 dan ortiq qabrni aniqlashgan edi.
Olimlar topilgan jasadlarning ko‘pchiligini o‘rta asrlar davrida yashagan odamlarga tegishli deb baholashmoqda. Qoldiqlar bilan birga turli maishiy buyumlar — tamaki cho‘plari, vino shishasi parchalari va turli xo‘jalik buyumlari ham topilgan. Bu esa hududning so‘nggi o‘rta asrlarda faol qo‘llanilganidan dalolat beradi.
Dastlabki tish tahlillari o‘sha davr odamlari shakar iste’moli yuqori bo‘lganini ko‘rsatdi. Bu esa o‘rta asrlarda turmush tarzi va ovqatlanish odatlari haqida yangi ma’lumotlar berishi mumkin.
“Gloster hududi haqiqatan ham katta tarixiy boyliklarga ega. Har gal bu yerda ishlaganimizda yangi va muhim kashfiyotlarga duch kelamiz”, — dedi loyiha rahbari Kliff Beytman.
Ma’lum qilinishicha, sentyabr oyida yangi kampusda topilgan buyumlardan maxsus ko‘rgazma tashkil etilishi rejalashtirilgan. Biroq inson qoldiqlari namoyish etilmaydi.
Bu topilma Britaniya tarixini yanada to‘ldiruvchi muhim voqea sifatida baholanmoqda va olimlar yana ko‘plab sirlar ochilishi mumkinligini ta’kidlashmoqda.
“Zamin”ni Telegramʻda oʻqing!
