Xitoyning Xunan provinsiyasida 11 yoshli maktab o‘quvchisi uy vazifalarini ortiqcha darajada bajarishga harakat qilib, salomatligiga jiddiy shikast yetkazdi, deb xabar berdi mahalliy OAVlar.
Ma’lum qilinishicha, 26 avgust kuni Lyan Lyan ismli bola ertalab soat 08:00 dan kechki 22:00 gacha uzluksiz dars tayyorlash bilan shug‘ullangan. O‘quvchi bir kunda barcha yozgi vazifalarini tugatishga uringan. Bir necha soat o‘tgach, unda bosh aylanishi, qo‘l-oyoqlarda karaxtlik, bosh og‘rig‘i va nafas qisilishi kabi belgilari paydo bo‘lgan.
Ota-onasi uni zudlik bilan shifokorga olib borgan. Mutaxassislar unga giperventilyatsiya sindromi tashxisini qo‘yishgan. Ushbu holat o‘quvchida tanafaffussiz fikriy va hissiy zo‘riqish natijasida yuzaga kelgan.
Bolaga maxsus nafas olish niqobi taqilgan va qisqa muddat ichida uning ahvoli barqarorlashgan. Shifokorlar bu kabi holatlar ko‘pincha ota-onalar bosimi, imtihonlardan oldingi xavotir, yoki gadjetlardan uzoq vaqt foydalanish bilan bog‘liqligini ta’kidlashmoqda.
Giperventilyatsiya sindromi nafaqat nafas olishda qiyinchilik, balki mushaklar tortishi, yurak urishining kuchayishi va hatto hayot uchun xavfli oqibatlarga olib kelishi mumkin.
Avgust oyi davomida Xunan provinsiyasida aynan shu belgilari bilan tez tibbiy yordamga 30 dan ziyod bola murojaat qilgani qayd etilgan. Bu ko‘rsatkich o‘tgan oylarga nisbatan 10 barobar yuqori ekani aytilmoqda.
“Zamin”ni Telegramʻda oʻqing!
