AQSHning Kaliforniya shtatidagi Anaheim shahrida joylashgan Disneylend parklaridan birida 4-oktyabr kuni noxush voqea sodir bo‘ldi. The Haunted Mansion («Arvohlar qasri») attraksionida 60 yoshli ayol yurak xurujiga uchrab vafot etdi, deb xabar berdi mahalliy manbalar.
Guvohlarning aytishicha, u sayohat paytida o‘zini yomon his qilib qolgan. Disneylendning xavfsizlik xodimlari tezkorlik bilan yurak massaji qilgan va tez yordam chaqirgan. Biroq shifokorlar shifoxonada uning hayotini saqlab qololmagan.
Politsiya va yong‘in-qutqaruv xizmati attraksionda texnik nosozlik bo‘lmaganini bildirdi. Orange okrugi sud-tibbiy ekspertizasi boshqarmasi hozirda marhumaning aniq o‘lim sababini o‘rganmoqda. Disneylend ayolning shaxsini oshkor qilmadi.
Ma’muriyat bu holatdan afsusda ekanini bildirib, barcha attraksionlar har kuni xavfsizlik tekshiruvidan o‘tishini ta’kidladi. Biroq tibbiy holatlar, ayniqsa yurak bilan bog‘liq muammolari bo‘lgan mehmonlar orasida, kutilmagan holda yuz berishi mumkin.
The Haunted Mansion — Disneylendning eng mashhur attraksionlaridan biri bo‘lib, arvohlar, illyuziyalar va maxsus audio-effektlar orqali mehmonlarda qo‘rqinch va hayrat uyg‘otadi. Xellouin bayrami arafasida esa u yanada dahshatli muhitda bezatiladi.
Bu voqea esa, eng quvonchli joylar ham inson sog‘lig‘i uchun mas’uliyatni talab qilishini yana bir bor eslatdi.
“Zamin”ni Telegramʻda oʻqing!
