Oslodagi marosimida Nobel qo‘mitasi 2025 yilgi tinchlik mukofotini venesuelalik siyosiy arbob Mariya Korina Machadoga topshirishini e’lon qildi. Qo‘mita raisi Yorgen Vatne Fridnesning ta’kidlashicha, mukofot «Venesuela xalqining demokratik huquqlarini qat’iyat bilan himoya qilish yo‘lidagi tinimsiz sa’y-harakatlari» uchun berilmoqda.
Bu yil mukofotga jami 338 ta nomzod ko‘rsatildi: 244 nafari — jismoniy shaxs, 94 tasi — tashkilot. Solishtirish uchun, o‘tgan yili 286 nomzod (197 shaxs, 89 tashkilot) qayd etilgan, rekord ko‘rsatkich esa 2016-yilda — 376 nomzod bo‘lgan.
Yaqin yillarning laureatlari
- 2024: Nihon Hidankyo — Xirosima va Nagasakidagi atom bombardimonlari jabrdiydalari kengashi, yadroviy qurolsizlanish uchun olib borgan faoliyati uchun.
- 2023: Nargis Muhammadiy — Eronda ayollar huquqlari va inson erkinliklarini qo‘llab-quvvatlagani uchun.
- 2022: Rossiya «Memorial» tashkiloti, Ukraina Fuqarolik erkinliklari markazi va Belarusdan Ales Belyatskiy — inson huquqlarini himoya qilishdagi hissasi uchun.
- 2021: Dmitriy Muratov va Mariya Ressa — matbuot erkinligi va demokratiyani himoya qilishdagi jasorati uchun.
Nobel haqida qisqacha
Fiziologiya/tibbiyot, fizika, kimyo, adabiyot va tinchlik bo‘yicha Nobel mukofotlari dinamit ixtirochisi Alfred Nobel vasiyatiga binoan ta’sis etilgan bo‘lib, 1901-yildan buyon topshirib kelinadi.
Machadoga berilgan bu e’tirof Lotin Amerikasida demokratiya va fuqarolik qadriyatlari uchun olib borilayotgan kurashning global ahamiyatini yana bir bor ko‘rsatib turibdi.
“Zamin”ni Telegramʻda oʻqing!
