Qirg‘iziston Milliy xavfsizlik qo‘mitasi rahbari Qamchibek Tashiyev ma’lum qilishicha, 2026-yilda sobiq Jalolobod, hozirgi Manas shahriga respublika ahamiyatidagi uchinchi shahar maqomi beriladi, deb Uz24.uz xabar berdi.
Uning so‘zlariga ko‘ra, ayrim siyosatchilar Manas poytaxt bo‘lishi mumkinligini ta’kidlagan. “Agar biz bunga munosib bo‘lsak, nega yo‘q? Vaqt ko‘rsatadi. Biroq bu uchun shahar ham, xalq ham tayyor bo‘lishi kerak. Poytaxt bo‘lish oson emas — katta mablag‘, yangi infratuzilma va zamonaviylik talab etiladi”, — dedi Tashiyev.
Tashiyevning ta’kidlashicha, Jalolobodning Manas deb qayta nomlanishi strategik jihatdan to‘g‘ri qaror bo‘lgan. Shahar mamlakat taraqqiyotida muhim rol o‘ynay boshlagan va endi yangi maqomga loyiq sanaladi.
Hozirda Manas shahrida keng ko‘lamli qurilish va infratuzilma ishlari jadal sur’atda olib borilmoqda. Rejaga ko‘ra, u Qirg‘izistonning eng zamonaviy va rivojlangan markazlaridan biriga aylanishi kutilmoqda.
Eslatib o‘tamiz, 17-sentyabr kuni Jalolobod shahri nomi rasman Manas deb o‘zgartirilgan. Hozirda shaharda 184 mingdan ortiq aholi yashaydi, ularning taxminan 30 foizi o‘zbek millati vakillaridir.
“Zamin”ni Telegramʻda oʻqing!
