Portugaliyada jamoat joylarida yuzni yopib turuvchi kiyimlar — burqa, niqob va shunga o‘xshash liboslar taqiqlanishi mumkin, deb yozadi The Guardian.
Bu qonun loyihasi o‘ta o‘ngchi “Chega” partiyasi tomonidan taklif qilingan. Partiya vakillari fikricha, yuzni yashirish ayollar erkinligi va tenglik tamoyillariga zid. Ammo parlamentdagi so‘l partiyalar bu fikrni qo‘llab-quvvatlamadi.
Hujjatda “jinsiy yoki diniy sabablarga ko‘ra yuzni yopish” haqida so‘z boradi. Qoidabuzarlik uchun jarimalar 200 yevrodan 4000 yevrogacha bo‘lishi belgilangan. Shuningdek, ayollarni diniy kiyim kiyishga majburlaganlarga uch yilgacha qamoq jazosi nazarda tutilgan.
Qonun loyihasiga ko‘ra, ayrim holatlarda yuzni yopishga ruxsat beriladi — masalan, samolyot bortida, diplomatik vakolatxonalarda yoki ibodat joylarida.
Hozirda hujjat Portugaliya Prezidenti Marselu Rebelu de Souzaga imzolash uchun yuborilgan. Ammo jurnalistlar uning qonunni qayta ko‘rib chiqish uchun Konstitutsiyaviy sudga yuborishi mumkinligini ta’kidlamoqda.
Ekspertlar aytishicha, Portugaliyada burqa yoki niqob kiyadigan ayollar soni juda oz, ammo bu masala Yevropaning boshqa davlatlaridagi kabi qizg‘in bahslarga sabab bo‘lishi ehtimoldan xoli emas.
Mahalliy jamoatchilikda bu tashabbus erkinlik va shaxsiy tanlov masalasiga aylanib, turli fikrlarni keltirib chiqardi. Bir taraf diniy erkinlikni himoya qilishni muhim desa, ikkinchisi xavfsizlik va ochiqlikni ustuvor deb hisoblaydi.
Qonunning qabul qilinishi Portugaliyani Fransiya va Belgiya kabi burqa taqiqlangan Yevropa davlatlari qatoriga qo‘shishi mumkin.
“Zamin”ni Telegramʻda oʻqing!
