Qirg‘izistonda Jalolobod shahrining nomi Manas deb o‘zgartirilgandan keyin, bu hudud atrofida qizg‘in muhokamalar boshlandi. Milliy xavfsizlik davlat qo‘mitasi rahbari Qamchibek Tashiev bu haqda fikr bildirib, 24.kg nashriga ko‘ra, Manasning kelajakda poytaxtga aylanishi ehtimolini istisno etmadi.
Tashievning so‘zlariga ko‘ra, 2026 yilda Manas Bishkek va O‘shdan keyin respublika ahamiyatidagi uchinchi shahar maqomini oladi. Uning ta’kidlashicha, Jalolobod nomini Manas deb o‘zgartirish strategik jihatdan to‘g‘ri qaror bo‘lgan, chunki hudud “respublikaning istiqbolli rivojlanish nuqtalaridan biriga aylangan”.
«Ba’zilar aytishicha, Manas poytaxt bo‘lishi mumkin. Agar biz shunga loyiq bo‘lsak, nega yo‘q? Ammo bu oson ish emas, shaharni tayyorlash, aholini tayyorlash va ruhiy jihatdan ham yangilanish kerak. Poytaxt bo‘lish katta mas’uliyat, bu uchun zamonaviy infratuzilma va katta sarmoya zarur», — dedi u.
Shu bilan birga, Tashiev shaharda keng ko‘lamli qurilish va infratuzilma islohotlari amalga oshirilayotganini ma’lum qildi. «Manas Qirg‘izistonning eng zamonaviy va rivojlangan shaharlaridan biriga aylanishi kerak», — deya qo‘shimcha qildi u.
Ma’lumot uchun, 17 sentyabr kuni prezident Sadir Japarov Jalolobod shahrini Manas deb qayta nomlash to‘g‘risidagi qonunni imzolagan. Qonun Jogorku Kenesh tomonidan 10 sentyabrda qabul qilingan. Rasmiy izohda aytilishicha, maqsad — milliy mafkurani mustahkamlash va xalq qahramoni Manas nomi bilan shaharni sharaflashdir.
Jalolobod viloyati O‘zbekistonning uchta viloyati bilan chegaradosh bo‘lib, maydoni 64,6 kvadrat kilometrni tashkil etadi. Shaharda 186 mingdan ziyod aholi yashaydi, ular orasida o‘zbeklar ham ko‘pchilikni tashkil etadi.
Bu yangilik qirg‘iz jamoatchiligida katta qiziqish uyg‘otdi — ayrimlar buni milliy g‘urur ramzi sifatida qabul qilmoqda, boshqalar esa poytaxtni ko‘chirish g‘oyasiga ehtiyotkorona yondashmoqda.
“Zamin”ni Telegramʻda oʻqing!
