“Numbeo” platformasi ma’lumotlariga ko‘ra, Markaziy Osiyo davlatlarida aholining asosiy xarajatlari oziq-ovqat va uy-joy to‘lovlariga to‘g‘ri keladi. Qolgan sarflar — kiyim-kechak, transport, sport va dam olish uchun ancha kam. Bu holat mintaqadagi ko‘plab oilalar, birinchi navbatda, asosiy ehtiyojlarni qondirishga intilayotganini ko‘rsatadi.
Tojikiston bu yo‘nalishda yetakchi bo‘lib, aholi daromadining 37 foizini oziq-ovqatga sarflaydi. Uy-joy ijarasi 20 foiz, restoranlar 15 foiz, transport 11 foizni tashkil etadi. Kiyim-kechak va dam olishga sarflangan mablag‘ eng kam — 6 va 5 foiz atrofida.
Qirg‘iziston va Qozog‘istonda ham manzara shunga o‘xshash: oziq-ovqat va uy-joy xarajatlari oilaviy budjetning qariyb yarmini tashkil etadi. Qirg‘izistonda oziq-ovqat ulushi 28 foiz, ijara 25 foiz, Qozog‘istonda esa mos ravishda 30 va 23 foiz.
Turkmaniston va O‘zbekistonda ham vaziyat o‘xshash. Turkmanistonda oziq-ovqat xarajatlari 35 foiz, uy-joy to‘lovlari salkam 30 foizni tashkil qiladi. O‘zbekistonda esa sport va hordiqqa ajratiladigan mablag‘ — 7 foiz — mintaqadagi eng yuqori ko‘rsatkich hisoblanadi.
Boshqa MDH davlatlarida ham aholi xarajatlarining tuzilishi deyarli bir xil. Rossiyada oziq-ovqat uchun 29 foiz, Belarusda 29,3 foiz, Armaniston va Ozarbayjonda esa oziq-ovqat, ijara va restoranlar xarajatlari birgalikda umumiy budjetning 60 foizidan ortig‘ini tashkil etadi.
Mutaxassislar fikricha, bu raqamlar Markaziy Osiyo aholisi daromadining katta qismi asosiy ehtiyojlarga ketishini va sarflarning hali ham hayotiy zaruratlar doirasida ekanini ko‘rsatadi.
“Zamin”ni Telegramʻda oʻqing!
