Maldiv orollarida sog‘lom kelajakni ta’minlashga qaratilgan yangi tamaki cheklovi kuchga kirdi, deb xabar berdi Sog‘liqni saqlash vazirligi.
1 noyabrdan boshlab 2007 yil 1 yanvardan keyin tug‘ilgan har qanday shaxs — mahalliy fuqaro yoki sayyoh bo‘lishidan qat’i nazar — endi tamaki mahsulotlarini sotib olish, sotish yoki chekish huquqiga ega emas.
Vazirlikning ma’lum qilishicha, qoida hamma uchun bir xil tatbiq etiladi, hech kimga istisno yo‘q. Bu orqali kelajakda chekishdan xoli, sog‘lom avlodni shakllantirish maqsad qilingan.
Qonunga muvofiq, tamaki mahsulotini yoshlarga sotganlarga 50 ming rufiy miqdorida jarima solinadi. Shuningdek, elektron sigaretalarni noqonuniy ishlatganlar 5 ming rufiy jarima to‘laydi.
Ma’lumki, “chekishsiz avlod” g‘oyasini ilk bor Yangi Zelandiya amalga oshirgan edi, ammo keyinchalik hukumat o‘zgarishi orqali bu cheklov bekor qilingan. Hozirda o‘xshash tashabbus Buyuk Britaniyada ham muhokama qilinmoqda.
Mutaxassislar bunday siyosatni jamiyat sog‘lig‘iga investitsiya sifatida baholamoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
