Rossiyaning Sochi shahridagi ko‘p qavatli uyda 31 oktyabr kuni sodir bo‘lgan yong‘in paytida o‘zbekistonlik haydovchi Sherzod Namozovning jasurligi minglab odamlarni lol qoldirdi. U hayoti xavf ostida qolgan ona va uning bolasini qutqarib qoldi.
Guvohlarning so‘zlariga ko‘ra, Alpiyskaya ko‘chasidagi uyning yuqori qavati yong‘in bilan qamralgan paytda, bir ayol bolasi bilan deraza orqali yordam so‘ragan. Shu zahotiyoq o‘sha joyda mijozini tushirayotgan Sherzod vaziyatni ko‘rib, bir lahzada yordamga shoshilgan.
U pastki qavat oynasidan chiqib, dastlab bolani xavfsiz joyga tushirgan, so‘ngra narvon yordamida onaga yordam berib, uni ham pastga olib tushgan. Har ikkisi ham sog‘-salomat qutqarilgan.
Sherzod Namozov Surxondaryo viloyatining Termiz tumani Uchqizil mahallasida tug‘ilgan. Rossiyada haydovchilik bilan shug‘ullanadi.
“Yordamga muhtoj insonni ko‘rgan odam unga yordam berishga shoshilishi tabiiy. Men faqat insoniy burchimni bajardim”, — dedi u keyinroq.
Rossiya Favqulodda vaziyatlar vazirligi ma’lumotlariga ko‘ra, yong‘in 600 kvadrat metr maydonni qamrab olgan. Hodisada jami uch kishi qutqarilgan, bir necha kishi jarohatlangan.
Mutaxassislar Sherzodning bu ishini haqiqiy jasorat deb baholab, uning harakatini insonparvarlik namunasi sifatida e’tirof etmoqda.
“Zamin”ni Telegramʻda oʻqing!
