Indoneziya poytaxti Jakartada juma namozi chog‘ida portlash yuz berdi, deb xabar berdi mahalliy rasmiylar. Hodisa natijasida kamida 50 dan ortiq kishi tan jarohati olgan.
Ma’lumotlarga ko‘ra, fojia shaharning shimoliy qismidagi Kelapa Gading tumanida joylashgan 27-son davlat o‘rta maktabining masjidida sodir bo‘lgan. Shu vaqtda masjidda asosan o‘quvchilar bo‘lgani sababli jabrlanganlarning ko‘pchiligi o‘smir yoshda ekani aytilmoqda.
Dastlabki ma’lumotlarga ko‘ra, portlash ovoz kuchaytirgich tizimi yaqinida ro‘y bergan. Ammo hozircha rasmiylar sabab haqida aniq ma’lumot bergani yo‘q — hodisa elektr tizimidagi nosozlik yoki qo‘lda yasalgan portlovchi moslama tufayli yuz bergan bo‘lishi mumkin.
Portlashdan so‘ng voqea joyiga tez yordam va qutqaruv xizmatlari yetib kelgan. Barcha jarohatlanganlar yaqin atrofdagi shifoxonalarga yetkazilgan.
Politsiya hodisa yuzasidan tergov boshlaganini ma’lum qildi. Havfsizlik kameralari yozuvlari o‘rganilayotgani, guvohlar bilan so‘rovnoma olib borilayotgani aytilmoqda.
Hozircha masjid atrofi yopilgan, hodisaga aniq nima sabab bo‘lganini aniqlash bo‘yicha surishtiruv ishlari davom etmoqda.
“Zamin”ni Telegramʻda oʻqing!
