Rossiyada oilaviy munosabatlar borasida yangi bahslarga sabab bo‘lgan taklif muhokama qilinmoqda. Bryansk viloyat dumasidagi “Yagona Rossiya” deputati Mixail Ivanov mamlakatda ajrashgan fuqarolarni 40 ming rubl miqdorida jarimaga tortishni taklif qildi. Bu haqda TASS xabar berdi.
Deputat mazkur tashabbusni Butunjahon rus xalqi kengashi sessiyasida yoritar ekan, nikoh tuzayotganlarga 20 ming rubl to‘lov joriy etishni ham taklif qildi. Uning fikricha, ajralish jarimasi tartibsiz budjetni “muvozanatlovchi omil” sifatida qo‘llab-quvvatlashi mumkin.
Ivanov qo‘shimcha qilib, qonunchilikka “onalik va bolalikni obro‘sizlantirish”ni taqiqlovchi norma kiritish lozimligini ta’kidlab, ortiqcha erkinlikka chek qo‘yishni taklif etdi.
Mavzu federal miqyosda ham qizg‘in muhokamada. Yaqinda Davlat dumasida ajrashgan ota-onalarni bolani birgalikda tarbiyalashga majburlovchi qonun loyihasi taqdim etilgan. Unda kelishuvga erisha olmagan hollarda tarbiyalash tartibini sud belgilab berishi taklif qilingan.
Rossiyada ajralishlar statistikasi ham e’tiborga molik. Jamoatchilik fikrini o‘rganish markazi ma’lumotlariga ko‘ra, mamlakat ajralishlar soni bo‘yicha dunyoda uchinchi o‘rinda: har o‘nta nikohdan sakkizi ajrashuv bilan yakunlanadi. 2023 yilda 683 mingga yaqin, 2024 yilda esa 644 ming ajralish ro‘yxatga olingan. Shu bilan birga nikoh tuzishlar soni ham pasaygan.
2025 yildan belgilangan rasmiy to‘lov 650 rubldan 5000 rublgacha oshirilgan bo‘lib, rasmiylar buni “rus oilalarini mustahkamlash chorasi” deb atagan.
So‘rovnomalarga ko‘ra, rossiyaliklarning 33 foizi ajrashish sababi sifatida moliyaviy qiynalishlarni, 15 foizi tushunmaslikni, 14 foizi esa xiyonat va rashkni ko‘rsatgan. Psixologlar mamlakatdagi umumiy noaniqlik va xavotir muhiti ham nikoh barqarorligiga ta’sir qilayotganini ta’kidlamoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
