Rossiya prezidenti Vladimir Putinning ta’kidlashicha, Moskva Hindistonning tez sur’atlar bilan o‘sib borayotgan iqtisodiyotini qo‘llab-quvvatlash maqsadida ushbu mamlakatni barqaror va uzluksiz yoqilg‘i bilan ta’minlashni davom ettiradi. Bu haqda u Hindiston Bosh vaziri Narendra Modi bilan uchrashuvdan so‘ng ma’lum qildi.
Putinning aytishicha, energetika sohasidagi hamkorlik mustahkam ildam bormoqda va Rossiya Hindiston uchun ishonchli yetkazib beruvchi sifatida o‘zini namoyon qilgan. Neft va neft mahsulotlari bo‘yicha savdo hamda Hindiston korxonalarida Rossiya neftini qayta ishlash rejaga muvofiq amalga oshirilmoqda.
Avgust oyida AQSH prezidenti Donald Tramp Hindistonga Rossiya neftini xarid qilish uchun qo‘shimcha 25 foiz boj joriy etgandi. Vashington, shuningdek, bu kabi choralarni Rossiyaning boshqa sheriklariga ham tatbiq qilish mumkinligini ma’lum qilgan.
Vaziyatga izoh bergan Hindiston Bosh vaziri Narendra Modi mamlakat o‘z iqtisodiy manfaatlarini himoya qilishda qat’iy ekanini, hatto bu katta sarf-xarajatlarga olib kelsa ham, orqaga chekinmasligini ta’kidladi.
Rossiya TIV rahbariyati esa AQSHning tarif tahdidlari Nyu-Dehlining pozitsiyasiga ta’sir qilmaganini, Hindiston Rossiya yoqilg‘isini import qilish rejalarini o‘zgartishni o‘ylamayotganini ma’lum qildi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
