Kay bu haqda 76 million obunachiga ega influyenser Logan Polning Impaulsive podkastida so‘zlab berdi. Uning aytishicha, maxfiy xizmat hayotiga kirib kelganidan keyin hamma narsa keskin o‘zgargan: oddiy vaziyatlar ham g‘alati ko‘rinish ola boshlagan.
“Bu juda og‘ir. Do‘stlaring bilan, bir guruh qizlar bilan o‘tirsang, taxminan bir metr orqangda ulkan bir erkak tursa — kayfiyat avtomatik ravishda o‘zgaradi”, deydi u.
Kayning ta’kidlashicha, uchrashuv paytida ham bu holat ayniqsa noqulay: agentlar “kayfiyatni buzuvchi omil”ga aylanib qoladi. “Ochig‘ini aytsam, bir yigit bilan uchrashuvda bo‘lib, u sendan ikki stol narida o‘tirsa — bu haqiqatan ham g‘alati”, deydi u.
Kay 2024 yili bobosi prezidentlikka saylangandan keyin “diqqatni jamlab, qo‘riqchilarni go‘yo yo‘qdek qabul qilish”ga majbur bo‘lganini aytdi. Ya’ni, oddiy yoshlik — rasman bor, amalda esa doim kuzatuvda.
Qizig‘i, Kayning bu muammosi faqat ungagina tegishli emas. Uning amakisi Barron Tramp ham uchrashuvlarda xuddi shunday qiyinchiliklarni boshdan kechirayotgani aytiladi. Page Six tabloidiga ko‘ra, Barron uchrashuvga chiqishi uchun Trump Tower binosining butun bir qavati tekshirib chiqilgan.
Kay esa hozircha oila qurish haqida o‘ylamayotganini ochiq aytgan. Uning gapiga ko‘ra, onasi Vanessa Tramp doim bir narsani uqtiradi: avval karera, keyin qolgani. Kay ham shu yo‘lni tanlab, avvalo golfda o‘zini ko‘rsatish, turnirlarda g‘alaba qozonishni maqsad qilgan.
Qisqasi, “prezident nabirasi” degan maqom tashqi tomondan chiroyli tuyulishi mumkin, lekin ichkaridan qaraganda bu — oddiy hayotga doimiy cheklov. Yoshlik kayfi esa… qo‘riqchilar bilan birga “propusk” orqali kiradi.
“Zamin”ni Telegramʻda oʻqing! 
Ctrl
Enter
Xato topdIngizmi?
Iborani ajratib Ctrl+Enter tugmasini bosing 
