So'nggi kunlarda xalqaro ommaviy axborot vositalari va ijtimoiy tarmoqlarda Islomiy inqilob qo'riqchilari korpusi “Al-Quds” maxsus bo'linmasi qo'mondoni, general Ismoil Qooniy taqdiri bilan bog'liq turli xabarlar qizg'in muhokama qilinmoqda. Ayrim manbalar general “Mossad” bilan hamkorlikda gumon qilinib, qatl etilgan bo'lishi mumkinligini da'vo qilmoqda. Biroq, ushbu ma'lumotlar hozircha hech qanday rasmiy manba tomonidan tasdiqlangani yo'q.
“The National” nashri tahliliga ko'ra, internetda tarqalayotgan bu kabi shov-shuvli xabarlarning aksariyati aniq manbaga ega emas. Ular asosan ijtimoiy tarmoqlardagi noma'lum akkauntlar tomonidan tarqatilayotgan taxminlardan iborat. Qizig'i shundaki, Ismoil Qooniy haqida bunday xabarlar avval ham kuzatilgan. Xususan, 2024 yil kuz oylarida ham uning vafot etgani haqida gap-so'zlar tarqalgan, biroq keyinchalik general ommaviy tadbirlarda ko'rinish berib, bu mish-mishlarni rad etgan edi.
Ba'zi xabarlarda Qooniyning Isroil zarbalaridan bir necha bor omon qolgani unga nisbatan shubhalarni kuchaytirgan bo'lishi mumkinligi aytilmoqda. Biroq, bu kabi iddaolar ham hech qanday ishonchli dalillarga asoslanmagan. Hozirgi vaziyatda axborot maydonida tarqalayotgan bu kabi xabarlarga ehtiyotkorlik bilan yondashish va faqat rasmiy bayonotlarga tayanish maqsadga muvofiqdir. Axborot urushi davrida tasdiqlanmagan ma'lumotlarni haqiqat deb qabul qilish noto'g'ri xulosalarga olib kelishi mumkin.
“Zamin”ni Telegramʻda oʻqing!
