Eron tashqi ishlar vaziri Abbos Arakchi Tehron va Moskva o'rtasidagi hamkorlik hech qanday yangilik yoki sir emasligini ta'kidladi. U bu haqda 8 mart kuni NBC News telekanaliga bergan intervyusida AQSh bilan yuzaga kelgan ziddiyatlar fonida Rossiyaning Eronga ko'rsatayotgan yordami haqidagi savollarga javob berar ekan aytib o'tdi. Bu haqda tengrinews.kz xabar beradi.
Vazir Rossiya tomoni Eron bilan ko'plab yo'nalishlarda hamkorlik qilayotganini tasdiqladi, biroq Rossiya maxsus xizmatlari AQSh harbiy ob'ektlarini aniqlashda yordam berayotgani haqidagi savolga aniq javob bermadi. Arakchi o'zida bu borada batafsil ma'lumot yo'qligini qo'shimcha qildi.
Avvalroq The Washington Post gazetasi Rossiya Eronga Yaqin Sharqdagi Amerika qo'shinlariga zarba berish uchun razvedka ma'lumotlarini taqdim etayotgani haqida xabar tarqatgan edi. Nashrning ta'kidlashicha, Moskva shu yo'l bilan AQSh va Isroilning Eronga qarshi olib borayotgan urushida bilvosita ishtirok etmoqda. Manbalarga ko'ra, 28 fevraldan boshlab Rossiya Amerika kemalari va samolyotlari joylashgan hududlar haqida ma'lumotlar uzatgan bo'lishi mumkin.
Hozircha Rossiyaning raketa nishonlarini aniqlashdagi yordami qay darajada ekani to'liq oydinlashmagan. Biroq tahlilchilar jangovar harakatlar boshlanganidan buyon Eronning o'z imkoniyatlari bilan nishonlarni aniqlash salohiyati pasayganini qayd etishmoqda.
“Zamin”ni Telegramʻda oʻqing!
