Sayyoramizda kuzatilayotgan global isish jarayoni nafaqat tabiat, balki insoniyat demografiyasiga ham jiddiy ta'sir ko'rsatmoqda. Oksford universiteti olimlari tomonidan o'tkazilgan yangi tadqiqot natijalari shuni ko'rsatdiki, havo haroratining me'yordan ortiq ko'tarilishi o'g'il bolalar tug'ilish ko'rsatkichini pasaytirib yubormoqda.
Tadqiqotchilar Sahroyi Kabir janubidagi 33 ta davlat hamda Hindiston hududida 5 milliondan ortiq tug'ilish holatlarini tahlil qilib chiqishdi. Tahlillar shuni ko'rsatdiki, havo harorati Selsiy bo'yicha 20 darajadan oshgan davrlarda qiz bolalarga nisbatan o'g'il bolalar tug'ilishi kamaygan. Olimlarning fikricha, homiladorlikning dastlabki bosqichlarida haddan tashqari issiq harorat homila rivojlanishiga salbiy ta'sir ko'rsatadi.
Mutaxassislar erkak jinsiga mansub homilalar issiq haroratga nisbatan ancha chidamsiz ekanligini ta'kidlashmoqda. Aynan shu sababli, yuqori haroratli hududlarda homila nobud bo'lish xavfi ortadi va bu o'z navbatida tug'ilish statistikasi muvozanatining buzilishiga olib keladi. Ushbu ilmiy xulosa iqlim o'zgarishlari inson salomatligi va kelajak avlodlar demografiyasiga qanchalik chuqur ta'sir o'tkazishi mumkinligini yana bir bor tasdiqladi.
“Zamin”ni Telegramʻda oʻqing!
