AQSh harbiylari Ormuz bo'g'ozi yaqinida Eronning 16 ta minalovchi katerini yo'q qildi. Bu haqda 10 mart kuni AQSh Qurolli kuchlari Markaziy qo'mondonligi (CENTCOM) ma'lum qildi. Zarbalar Eronning mintaqadan neft tashuvchi kemalar o'tadigan Ormuz bo'g'ozini minalashtirish niyatida ekani haqidagi xabarlar ortidan berilgan. Bu haqda tengrinews.kz xabar beradi.
AQSh prezidenti Donald Tramp ham o'zining ijtimoiy tarmog'ida Eron kemalari yo'q qilinganini tasdiqladi. CENTCOM esa katerlarga zarba berilgani aks etgan videoni e'lon qildi. Yaqin Sharqdan neft tashish uchun eng muhim yo'laklardan biri bo'lgan Ormuz bo'g'ozi Isroil va AQShning Eronga qarshi urushi boshlanganidan beri fuqarolik kemalari tomonidan deyarli ishlatilmayapti.
10 mart tongida Islom inqilobi posbonlari korpusi AQSh va Isroil hujumlari davom etar ekan, mintaqadan bir litr ham neft eksport qilinishiga yo'l qo'ymasligini bildirdi. Shundan so'ng AQSh razvedkasiga tayanib, Eron Ormuz bo'g'ozini minalashtirishga tayyorgarlik ko'rayotgani xabar qilindi. Donald Tramp Tehronni bu harakati uchun misli ko'rilmagan oqibatlar kutayotgani haqida ogohlantirdi.
Eslatib o'tamiz, Isroil va AQSh 28 fevral kuni Eronga qarshi yirik hujumlarni boshlagan edi. Harbiy harakatlarning ilk kunida Eron oliy ruxoniysi oyatulloh Ali Xomenei va bir qator yuqori martabali amaldorlar halok bo'ldi. Uning o'rnini 56 yoshli o'g'li Mojtaba Xomenei egalladi. Bunga javoban Eron ham Isroil hududi va AQShning Yaqin Sharqdagi harbiy bazalariga zarbalar bermoqda.
“Zamin”ni Telegramʻda oʻqing!
