Eron tomoni Birlashgan Millatlar Tashkilotiga rasman murojaat qilib, Bahrayn, Saudiya Arabistoni, Qatar, Birlashgan Arab Amirliklari va Iordaniyadan “Eronga qarshi AQSH–Isroil harbiy to‘qnashuvidagi ishtiroki uchun” tovon to‘lash talabini ilgari surdi. Bu haqda Eronning BMTdagi doimiy vakili Amir Said Iravoniy maʼlum qildi.
Uning taʼkidlashicha, mazkur besh davlat xalqaro majburiyatlarni buzgan va shu sababli Eronga yetkazilgan barcha zararlarni to‘liq qoplashi kerak. Bu kompensatsiya moddiy yo‘qotishlar bilan birga, maʼnaviy va iqtisodiy zararlarni ham qamrab olishi lozimligi aytilgan.
Diplomat kompensatsiya miqdori hozircha aniq belgilanmaganini bildirdi. Uning so‘zlariga ko‘ra, bu masala bo‘yicha hisob-kitoblar davom etmoqda va yakuniy raqamlar keyinroq eʼlon qilinadi.
Avvalroq, mart oyida Eronning BMTdagi vakili Antoniu Guterrish nomiga maktub yo‘llab, Yaqin Sharqdagi ayrim davlatlarni AQSHning Eronga qarshi harakatlariga hududlaridan foydalanishga ruxsat berganlikda ayblagan edi.
Eron hukumat vakili Fotima Muhojironiyning maʼlum qilishicha, dastlabki baholarga ko‘ra, AQSH va Isroil zarbalari natijasida mamlakatga yetkazilgan umumiy zarar 270 milliard dollargacha yetishi mumkin. Bu hozircha faqat ilk, taxminiy hisob-kitoblar hisoblanadi.
Mutaxassislar avval infratuzilma va binolarga yetgan zararni baholashni, keyin esa davlat daromadlari yo‘qotilishi hamda sanoat korxonalarining to‘xtab qolishi oqibatlarini hisoblashni rejalashtirmoqda.
Shu bilan birga, Eron tomoni AQSH bilan ehtimoliy harbiy tovon masalasini ham muhokama qilayotgani aytilmoqda. Bu mavzudagi muzokaralar so‘nggi haftada Islomobodda o‘tkazilgan uchrashuvlarda ham ko‘tarilgan.
Xalqaro ommaviy axborot vositalari, jumladan The Jerusalem Post manbalariga ko‘ra, olti haftalik to‘qnashuvlar davomida Eron iqtisodiyotiga 140–145 milliard dollar atrofida zarar yetkazilgan bo‘lishi mumkin.
“Zamin”ni Telegramʻda oʻqing!
