AQSH Prezidenti Donald Tramp Ukraina mojarosi bo‘yicha muzokaralarni davom ettirish maqsadida Moskvaga amerikalik vakillarni yuborishga tayyor ekanini ma’lum qildi.
Jurnalistlar bilan muloqot chog‘ida Trampdan Rossiyaga muzokarachilar yuborish ehtimoli haqida so‘ralganda, u: “Agar bu natija berishiga ishonsam, albatta buni qilaman”, deya javob bergan. U, shuningdek, Rossiya va Ukraina o‘rtasidagi urushni tezroq yakunlash tarafdori ekanini ta’kidlagan.
Sulh va asirlar almashinuvi tashabbusi
Mazkur bayonot Rossiya tomonining ayrim tashabbuslarni qo‘llab-quvvatlagani fonida yangradi. Xususan, Rossiya Prezidenti yordamchisi Yuriy Ushakov 9–11 may kunlari o‘t ochishni to‘xtatish hamda “1000 ga 1000” formatida harbiy asirlar almashinuvini amalga oshirish g‘oyasiga ijobiy munosabat bildirilganini tasdiqlagan.
Avvalroq Tramp har ikki tomonga murojaat qilib, aynan shu sanalarda vaqtinchalik sulh e’lon qilish va asirlar almashinuvini yo‘lga qo‘yishni taklif etgan edi. U bu muddatni Rossiyada nishonlanadigan G‘alaba kuni bilan bog‘lagan.
Moskva muzokaralarga ochiq
Rossiya Tashqi ishlar vazirligi rasmiy vakili Mariya Zaxarova ham Moskva Ukraina bo‘yicha muzokaralardan voz kechmayotganini, amaliy natija beradigan har qanday tashabbusga tayyor ekanini bildirgan.
Uning so‘zlariga ko‘ra, hozirda ushbu jarayonda ishtirok etayotgan AQSH vakillari boshqa mintaqaviy masalalar, jumladan Yaqin Sharqdagi vaziyat bilan ham shug‘ullanmoqda.
“Zamin”ni Telegramʻda oʻqing!
