Shvetsiyada maktabga qilich bilan bostirib kirgan erkak otib o‘ldirildi

Shvetsiyaning Fagersta shahridagi maktabda qilich bilan qurollangan erkak politsiya tomonidan otib o‘ldirildi. Hodisa 21 avgust kuni sodir bo‘lib, hujum oqibatida bir necha kishi jarohat olgan. Bu haqda Aftonbladet xabar berdi.

Dastlabki ma’lumotlarga ko‘ra, erkak maktab binosiga kirib, sovuq qurol bilan odamlarga hujum qilgan. Uni qo‘lga olish chog‘ida politsiya o‘qotar qurol ishlatgan va gumondor voqea joyida halok bo‘lgan.

Shvetsiya politsiyasi Fagerstada maxsus operatsiya o‘tkazilganini tasdiqlagan, biroq tergov manfaatlarini inobatga olib hodisaning ayrim tafsilotlari hozircha oshkor qilinmagan.

Voqeadan so‘ng shahardagi bir nechta maktab va jamoat binolari vaqtincha yopildi. Ota-onalar farzandlari bilan bog‘lanishga shoshilgani sababli hududda qisqa muddatli sarosima yuzaga kelgan. Rasmiylar vaziyat to‘liq nazorat ostida ekanini ma’lum qilgan.