“Xalaqit bermanglar!” - Gruziya bosh vaziri Rossiyaga murojaat bilan chiqdi

BMT Bosh assambleyasida qilgan chiqishida Gruziya bosh vaziri Mamuka Baxtadze Abxaziya va Janubiy Osetiya aholisiga murojaat yoʻlladi. Uning maʼlum qilishicha, mamlakati kelajagi - respublikalar bilan birga. Bu haqda RIA “Novosti”ga asosan Kun.uz xabar bermoqda.

Baxtadzening maʼlum qilishicha, Gruziya tomoni mintaqalar mustaqilligi boʻyicha bahsni “suverenitet, hududiy yaxlitlik, inson huquqlarini himoya qilish, xalqaro huquq tamoyillariga hurmat prinsiplari asosida” hal qilmoqchi.

“Bugun men shu minbardan turib Abxaziya va Osetiyadagi vatandoshlarimizga murojaat qilmoqchiman. Gruziyaning har bir yutugʻi - sizning yutugʻingiz... Biz kelajagimizni faqat sizlar bilan birga koʻryapmiz”, - dedi Baxtadze.

Shuningdek, uning qoʻshimcha qilishicha, Abxaziya va Janubiy Osetiya aholisi Gruziya fuqarolarida bor boʻlgan barcha eng yaxshi narsalardan foydalanish imkoniga ega boʻlishi kerak - taʼlim, tibbiyot, Yevropa ittifoqi bilan vizasiz rejim.

“Men yana bir marta Rossiyaga murojaat qilmoqchiman - bizning tinch tashabbuslarimizga toʻsqinlik qilmang va xalaqit bermang”, - deya maʼlum qildi Baxtadze.

Eslatib oʻtamiz, avvalroq Janubiy Osetiya rahbari Gruziya bilan muloqot uchun shartini aytgandi.