Afgʻonistonda ilk attraksionlar bogʻi ochildi

Afgʻoniston poytaxti Kobulda mamlakatdagi ilk attraksionlar bogʻi ochildi, deb xabar berdi Kun.uz.

Doimiy portlashlar va teraktlardan charchagan Kobul aholisi va ularning farzandlarida urushdan biroz boʻlsa-da dam olish, zavqlanib, kayfiyatni koʻtarishga imkon paydo boʻldi. Kabul City Park deb nomlangan bogʻ Kobul daryosi boʻyida shahar hokimligi va xususiy kompaniyalar koʻmagida qurilgan. Bogʻ 5 gektardan koʻproq maydonni egallagan.

“Afgʻonistonliklar urushlar, portlashlar va terrorchilar hujumlaridan charchashgan. Umid qilamanki, shahar bogʻi ularning koʻngillarini ovutib, birozga boʻlsa-da baxtiyor qila oladi”, deb aytgan bogʻ direktori Habibulloh Asmatiy.

Bogʻda “tomosha gʻildiragi” va amerikancha tepaliklarda uchish mumkin, u yerda roliklarda uchish uchun yoʻlaklar, avtodrom, peyntbol uchun maydon va boshqa koʻplab attraksionlar mavjud.

Taʼkidlanishicha, koʻngilochar bogʻ soat 9dan yarimtungcha ishlaydi. Kuniga unga oʻrtacha mingga yaqin odam tashrif buyurmoqda. Bogʻga kirish chiptasi 30 afgʻoniyni (40 AQSH senti) tashkil qiladi. Attraksionlarga chiptalar esa alohida sotiladi. Bundan tashqari, bogʻda ovqatlanib, filmlar koʻrish uchun restoran va kinoteatrga aylantirilgan eski samolyot mavjud.