Barcha yashil bargli sabzavotlar orasida ismaloq eng ko‘p qirrali hisoblanadi. U smetanaga, salatga qo‘shilishi mumkin, bug‘da pishiriladi yoki garnir sifatida qovuriladi.
Va, albatta, bu mahsulot sog‘liq uchun bir qator afzalliklarga ega. U surunkali kasalliklardan himoya qiluvchi, miya, yurak-qon tomir va ko‘z salomatligini mustahkamlovchi vitaminlar va antioksidantlarni o‘z ichiga oladi.
Ismaloqning sog‘liqqa foydalari
Juda ko‘p oziq moddalar mavjud
Xom ismaloqning uchta porsiyasida taxminan 20 kaloriya, bir grammdan kam yog‘, ikki gramm oqsil, uch gramm uglevod va ikki gramm kletchatka mavjud.
Bu barglarda kaloriya past bo‘lsa ham, ular ozuqa moddalariga to‘la. Bir porsiya K vitaminining kunlik qiymatining 300 foizdan ortig‘ini, shuningdek, A vitamini va C vitaminining kunlik qiymatining 160 foizi va 40 foizdan ortig‘ini ta’minlaydi. K va A vitaminlari suyaklarni mustahkamlaydi, C esa yaralarni davolashga yordam beradi.
Ismaloq, shuningdek, qizil qon tanachalari va DNKni shakllantirishga yordam beradigan B guruhi vitamini bo‘lgan foliy kislotasining kunlik qiymatining 45 foizini o‘z ichiga oladi. Tarkibida temir, magniy, kaliy, kalsiy va oz miqdorda boshqa B guruhi vitaminlari mavjud.
Antioksidantlarga boy
Ko‘p vitamin va minerallarga qo‘shimcha ravishda ismaloq yallig‘lanishga qarshi va kasalliklardan himoya qiluvchi antioksidantlarni o‘z ichiga oladi.
Mahsulotda mavjud bo‘lgan ba’zi antioksidantlarga flavonoidlar sifatida ham tanilgan moddalar saraton, shuningdek, yurak-qon tomir va yallig‘lanish kasalliklaridan himoya qilishga yordam beradigan birikmalardir.
Jiddiy kasalliklardan himoyalanishga yordam beradi
Ushbu yashil barglardagi birikmalar oksidlovchi stressni kamaytirishi mumkin. Ular, shuningdek, metabolizm va yallig‘lanish jarayonida genlarning ifodalanishiga ijobiy ta’sir ko‘rsatadi. Bundan tashqari, bu birikmalar to‘yinganlik gormonlarining chiqarilishiga olib keladi.
Shu sabablarga ko‘ra ko‘proq ismaloq iste’mol qilish surunkali kasalliklarni, jumladan, yurak kasalliklari, saraton, 2-tur diabet va semirishni oldini olishga yordam beradi.
Miya salomatligini qo‘llab-quvvatlaydi
Ismaloqning yallig‘lanishga qarshi xususiyatlari uni miyani himoya qilish uchun asosiy da’vogarga aylantiradi.
2015 yilda Altsgeymer’s & Dementia jurnalida chop etilgan tadqiqotda tadqiqotchilar taxminan besh yil davomida 58 yoshdan 98 yoshgacha bo‘lgan 900 dan ortiq kattalarning ovqatlanish odatlari va kognitiv qobiliyatlarini kuzatdilar. Ular yashil bargli sabzavotlarni ko‘proq iste’mol qilganlarda kognitiv pasayish tezligining sezilarli darajada kamayganini kuzatdilar.
Qon bosimini nazorat qilishga yordam beradi
Ismaloq ham nitratlar, tabiiy kimyoviy moddalar manbai hisoblanadi. Nitratlar qon tomirlarini kengaytiradi. Bu qon oqimini yaxshilaydi va yurakdagi yukni yengillashtiradi.
Ismaloqdan qilingan smuzi, shuningdek, lavlagi sharbati ham qon bosimini pasaytirishi mumkin.
Ko‘z salomatligini mustahkamlaydi
Ismaloq tarkibidagi antioksidantlardan biri — lutein yoshga bog‘liq makula nasli (AMD) xavfini kamaytirishi mumkin. Bu o‘qish va haydash uchun zarur bo‘lgan o‘tkir markaziy ko‘rishni buzishi mumkin bo‘lgan ko‘z kasalligi hisoblanib, 55 yoshdan oshgan odamlarda ko‘rish qobiliyatini yo‘qotishning asosiy sababidir. Bu kasallikni oldini olish juda muhim, chunki uni davolab bo‘lmaydi.
Ismaloqning mumkin bo‘lgan yon ta’siri
Ismaloq muhim oziq moddalarga boy va ko‘pgina tadqiqotlar uning sog‘liq uchun foydasini tasdiqladi. Biroq ismaloqni ko‘p iste’mol qilish yon ta’sirga olib kelishi mumkin.
Mahsulot buyrak toshlarining shakllanishini kuchaytirishi mumkin. Bu ismaloq bilan bog‘liq eng keng tarqalgan muammo. U ko‘p miqdorda oksalatlarni o‘z ichiga oladi. Ular siydik yo‘llarida kalsiy bilan birikib, kalsiy oksalat toshlarining shakllanishiga olib kelishi mumkin. Shuning uchun buyrak kasalligi yoki toshlari bo‘lgan odamlar ismaloqdan uzoqroq turishlari kerak.
Mahsulot tarkibidagi K vitamini qon quyqalari shakllanishida muhim rol o‘ynaydi. Agar siz qonni suyultiruvchi dorilarni qabul qilsangiz, K vitaminini iste’mol qilishda ehtiyot bo‘lishingiz kerak. K vitamini ko‘p bo‘lgan ismaloq bu dorilarga xalaqit berishi mumkin.
“Zamin” yangiliklarini “Twitter”da kuzatib boring
