Uyquchanlik va doimiy charchoq bilan qanday kurashish mumkin?

Yirik shaharlar va megapolislarda yashovchi zamonaviy insonlarni uyquchanlik holati tez-tez bezovta qiladi. Doimiy shoshib yurish va ish kunining tez oʻtishi tufayli shahar aholisi tobora holsiz boʻlib boradi. Har kuni uygʻoniboq yana kech kirishini istaydiganlar ushbu muammoni hal qilishga kompleks tarzda yondashishi lozim.

^{Foto: Marie Claire}
Uyquchanlik sabablari

Mavsumiy uyquchanlikdan tashqari doimiy uyqu istagini keltirib chiqaradigan bir qator boshqa omillar ham mavjud. Masalan, turli kasalliklar, juda kech va kam uxlash, psixologik muammolar, dori-darmonlarning nojoʻya ta'siri, kislorod etishmasligi, suvsizlanish, homiladorlik kabilar doimiy charchoqqa sabab boʻladi.

Uyquchanlikdan qanday qutulish mumkin?

Avvalo, buning sababni aniqlash kerak. Shifokorga tashrif buyurib, doimiy holsizlik ortida nima borligini tushunishga yordam beradigan tekshiruvlardan oʻtish lozim. Agar sogʻliq bilan bogʻliq muammolar boʻlmasa, unda quyidagilar tavsiya etiladi.

Birinchidan, kundalik tartibni oʻzgartirish. Har kuni bir vaqtning oʻzida uxlashga yotish va bir vaqtning oʻzida uygʻonishga harakat qilish zarur. Kuniga kamida etti soat uxlashga harakat qilish ham muhim. Chunki bu vaqt dam olish va organizmni tiklash uchun optimal hisoblanadi.

^{Foto: Marie Claire}
Agar imkoni boʻlsa, uyquga yotishdan avval sayr qilish kerak. Bu orqali organizmni kislorod bilan toʻyintirish mumkin. Kislorod etishmasligi uyquchanlikning sabablaridan biri boʻlishi tabiiy. Shuning uchun muntazam ravishda xonalarni shamollatishni unutmaslik lozim. Bundan tashqari, sayr tezroq uxlab qolishga yordam beradi va uyqu sifatini yaxshilaydi.

Ratsionni oʻzgartirish ham tavsiya etiladi. Ayniqsa, kuz va qish faslida ovqatlanish tartibiga rioya qilish, xilma-xil va balansli taomlarni iste'mol qilish kerak. Har bir taom oqsil, yogʻ, uglevod va etarli miqdorda vitamin va mikroelementlarning jamlanmasini oʻz ichiga olishi kerak. Bundan tashqari, suv haqida unutmaslik juda ham muhim, organizmda etarlicha suyuqlik boʻlishi ham tanani tetik yurishiga yordam beradi. Spirtli ichimliklarni esa ratsiondan chiqarish shart.

Uyquchanlikning yana bir sabablaridan biri depressiya boʻlishi mumkin. Bunday holatda mutaxassisga murojaat qilish, hayot tarziga ijobiy oʻzgartirishlar kiritish yordam beradi. Masalan, yorqin kiyim kiyish, doʻstlar bilan uchrashish, koʻngilochar tadbirlarga borish tavsiya etiladi. Muhimi, depressiya sababini topish va undan xalos boʻlish kerak.

Qanday mahsulotlar qisqa fursatda tetiklik beradi?

^{Foto: Marie Claire}
Qahva, shakar, energetik ichimliklarni me'yorida ichish energiyani oshirishi mumkin. Albatta, ularni faqat vaqti-vaqti bilan iste'mol qilish kerak.

Jismoniy mashqlarni bajarish, doimiy harakatda boʻlish, sevimli biror sport mashgʻulotini bajarish lozim. Bir soʻz bilan aytganda, harakatsizlikdan qochish kerak, chunki u oʻz-oʻzidan uyquchanlikni keltirib chiqaradi.

Tez-tez sayr qilish, toza havodan nafas olish, ish vaqtida 5 daqiqaga tanaffus qilish ham uyquchanlikka qarshi kurashishda yordam beradi.

Faoliyatni oʻzgartirish. Monoton kun tartibi — tetiklikning eng yomon dushmani. Uzoq vaqt davomida bir holatda oʻtirish esa butun organizmda salbiy aks etadi. Shuning uchun ish vaqtida ofis xodimlariga tanada qon aylanishi uchun oddiy va engil mashqlarni bajarish tavsiya etiladi.

Manba: Daryo.uz “Zamin” yangiliklarini “Telegram”da kuzatib boring