Inson tanasining tabiiy hidi har bir kishining o‘ziga xos belgisidir. Olimlar fikricha, bu hid faqat gigiyena yoki genlarga emas, balki iste’mol qilinadigan ovqatlarga ham bog‘liq. So‘nggi tadqiqotlar ayrim mahsulotlar tananing hidini yoqimliroq qilishi va hatto insonni boshqalarga jozibadorroq ko‘rsatishini ko‘rsatgan.
Masalan, sabzavot va mevalarga boy ovqatlanadigan insonlarning tanasidan yoqimli, shirin va gulli hid kelishi aniqlangan. Aksincha, uglevodga boy yoki go‘shtni ko‘p iste’mol qiladigan insonlarning hidi unchalik yoqimli bo‘lmagan. Shunga qaramay, sarimsoq iste’mol qilgan erkaklarning ter hidi tadqiqotlarda yoqimli deb topilgan. Olimlar bu holatni sarimsoqning sog‘liqni yaxshilovchi tabiiy moddalariga bog‘lashadi.
Spirtli ichimlik va kofe esa tana hidini yomonlashtirishi mumkin. Spirt parchalanganda kuchli hidli modda ajraladi, bu esa og‘izdan noxush hid kelishiga sabab bo‘ladi. Kofe esa ter ajralishini kuchaytirib, bakteriyalar ko‘payishiga imkon yaratadi. Shu bois, bu mahsulotlarni me’yorida iste’mol qilish tavsiya etiladi.
Mutaxassislar ta’kidlaydiki, yoqimli hidli bo‘lish uchun atir yoki parfyumning o‘zi yetarli emas. Tananing tabiiy hidi avvalo to‘g‘ri ovqatlanish bilan bog‘liq. Sog‘lom, sabzavot va mevalarga boy ratsion nafaqat sog‘liqni mustahkamlaydi, balki insonni boshqalarga yanada jozibador qiladi.
“Zamin”ni Telegramʻda oʻqing!
