Inson hayotidagi ko‘plab muvaffaqiyatlar, ichki xotirjamlik va omad tushunchasi nafaqat tashqi sharoitlarga, balki uning ichki olami va ruhiy holatiga ham bog‘liq ekani haqida ko‘p gapiriladi. Ayrim mutaxassislar insonning energiyasi, kayfiyati va hatto hayotga munosabati uning “aurasi” bilan chambarchas bog‘liqligini ta’kidlaydi. Shu sababli ham baxt, boylik, omad va xotirjamlik insonning ichki pokligi bilan uyg‘un holda keladi, degan qarashlar keng tarqalgan.
Ta’kidlanishicha, inson aurasining mustahkamligi va sog‘lomligi uch asosiy yo‘nalishga tayanadi. Bular — jismoniy, ruhiy va emotsional salomatlikdir. Ushbu omillardan biri izdan chiqsa, inson hayotida turli muammolar, tushkunlik va ichki bo‘shliq paydo bo‘lishi mumkin.
Jismoniy salomatlikning buzilishi insonning nafaqat tanasiga, balki ruhiyatiga ham salbiy ta’sir ko‘rsatadi. Mutaxassislar spirtli ichimliklarga ruju qo‘yish, tamaki chekish, zararli odatlarga berilish va tananing imkoniyatlaridan noto‘g‘ri yo‘llarda foydalanish inson energiyasini susaytirishini aytishadi. Bunday holat insonning hayotga bo‘lgan qiziqishini pasaytirib, ichki kuchini kamaytirishi mumkin.
Ruhiy salomatlik esa insonning ichki dunyosi bilan bog‘liq hisoblanadi. Ibodat va duodan uzoqlashish, doimiy noshukurlik, yolg‘onga moyillik va ortiqcha qaysarlik inson qalbida og‘irlik paydo qiladi. Bu esa vaqt o‘tishi bilan insonning kayfiyatiga, atrofdagilar bilan munosabatiga va hatto ishidagi omadiga ham ta’sir o‘tkazishi mumkin.
Emotsional salomatlik ham auraning muhim qismlaridan biri sanaladi. Doimiy salbiy fikrlar, xafagarchilik, g‘azab va tushkunlikni ichida saqlab yurish insonning ichki energiyasini “yemirib” boradi. Psixologlar inson qanchalik ko‘proq ijobiy fikrlashga harakat qilsa, uning hayotga munosabati ham shunchalik yengillashishini ta’kidlashadi.
Shuning uchun ko‘plab mutaxassislar inson avvalo o‘z ichki dunyosiga e’tibor qaratishi, tanasi, ruhi va hissiyotlarini muvozanatda ushlashga harakat qilishi kerakligini uqtirishmoqda. Chunki xotirjam qalb, sog‘lom fikr va toza energiya ko‘p holatlarda insonni baxt, omad va yangi imkoniyatlar sari yetaklaydi.
“Zamin”ni Telegramʻda oʻqing!
