Qoraqalpog‘istondagi Ustyurt platosidan juda katta gaz zaxirasi aniqlangani haqida Prezident Shavkat Mirziyoyev 15-sentyabr kuni xalq bilan muloqot chog‘ida ma’lum qildi. Davlat rahbarining ta’kidlashicha, bu yangilik nafaqat mamlakatimiz sanoati, balki butun mintaqamiz iqtisodiy istiqbollari uchun ulkan ahamiyatga ega bo‘ladi.
Prezidentga ko‘ra, O‘zbekiston yerostida boy va serqirra qazilma zaxiralari mujassam. Ilgari neft va gaz sohalarida qidiruv va qazib chiqarish ishlari asosan 2,5–3 ming metr chuqurlikda amalga oshirilardi. Biroq bu yil ilk bor mamlakatimiz sanoat tarixida beqiyos qadam qo‘yildi — Ustyurt hududida 6,5 ming metr yer qa’riga kirib borildi va natijada katta gaz zaxirasi topildi. Bu esa geologiya sohasida yangi davr boshlanganini anglatadi.
Davlat rahbari shuningdek, bugungi kunda «to‘rtinchi sanoat inqilobi»ni amalga oshirishda texnologik resurslar asosiy omilga aylanayotganini qayd etdi. Ayniqsa, tellur, litiy, selen, grafit, molibden kabi minerallarga talab butun dunyoda keskin o‘smoqda. Tahlillardan kelib chiqqan holda, Yer sharidagi volfram, molibden, rux va titan kabi muhim resurslarning 10–15 foizi bevosita bizning mintaqamizga to‘g‘ri kelishi e’tirof etildi.
Prezident Mirziyoyev ta’kidlaganidek, «ushbu ulkan resurslarni yuqori qo‘shilgan qiymatli mahsulotga aylantirish uchun nafaqat texnologiya yoki sarmoya, balki avvalo ilm, bilim va innovatsiya zarur». Unga ko‘ra, faqat ana shunday yo‘l orqali tabiiy boyliklardan keng va samarali foydalanish, mamlakat taraqqiyotini yangi bosqichga olib chiqish mumkin bo‘ladi.
Mutaxassislar fikricha, Ustyurt platosida topilgan ushbu ulkan gaz zaxirasi nafaqat energetika sohasini quvvatlantiradi, balki butun iqtisodiy tizimga katta sur’at beradi. Shu tariqa, O‘zbekistonning tabiiy resurslar sohasidagi istiqbollari yanada kengayishi kutilmoqda.
“Zamin”ni Telegramʻda oʻqing!
