Janubiy Koreya va AQSh o‘rtasidagi savdo muzokaralari valyuta masalalari sababli to‘xtab qoldi. Iyul oyida AQSh prezidenti Donald Tramp bilan e’lon qilingan 350 milliard dollarlik investitsiya paketi Seul iqtisodiyoti uchun og‘ir yuk bo‘lishi mumkinligi aytilmoqda.
Yaponiya yaqinda AQSh bilan 550 milliard dollarlik shartnoma imzolagan bo‘lsa-da, Janubiy Koreya shunday shartlarni qabul qilishga tayyor emas. Sababi – koreys valyuta bozori hajmi kichik, katta miqdorda dollar talabi esa milliy valyuta vonning qadrsizlanishiga olib kelishi mumkin.
So‘nggi yillarda von bosimi kuchaygan. O‘tgan yilda u so‘nggi 15 yildagi eng past darajaga tushdi. Mutaxassislarning hisobiga ko‘ra, yangi kelishuv 2026–2028-yillarda har yili 100 milliard dollargacha dollar talabini oshiradi, bu esa mamlakat iqtisodiyotiga jiddiy bosim qiladi.
Janubiy Koreya muammoni yumshatish uchun AQSh bilan valyuta svop kelishuvi (valyuta yoki foiz stavkasi almashuvi bo‘yicha shartnoma) tuzishni muhokama qilmoqda. Hozircha bunday imtiyoz faqat Yaponiya va bir nechta yirik davlatlarga berilgan. Mutaxassislar bunday kelishuv Koreya iqtisodiyotini barqarorlashtirishga yordam berishini ta’kidlashmoqda.
“Zamin”ni Telegramʻda oʻqing!
