O‘zbekistonda olma yetishtirish va uni eksport qilish hajmi sezilarli darajada ortmoqda. Milliy statistika qo‘mitasi ma’lumotlariga ko‘ra, 2025 yilning yanvar–avgust oylarida mamlakat 10 ta davlatga jami 22,6 ming tonna olma eksport qilgan.
Bu ko‘rsatkichning umumiy qiymati 11,6 million AQSh dollariga teng bo‘ldi. Eng yirik xaridorlar qatorida Rossiya (10 721 tonna) va Qozog‘iston (10 098 tonna) yetakchilik qilmoqda. Shuningdek, Qirg‘izistonga 1 275 tonna, Turkmaniston va Iroqqa esa 300 tonnadan ortiq olma eksport qilingan.
Mutaxassislarning fikricha, O‘zbekiston Markaziy Osiyoda olma yetishtirish bo‘yicha yetakchi o‘rinlardan birini egallamoqda. Mahalliy iqlim sharoiti, tabiiy sug‘orish tizimlari va yangi intensiv bog‘lar bu sohada sifatni oshirgan. Natijada, o‘zbek olmalarining tabiiy ta’mi va raqobatbardosh narxi chet el xaridorlari orasida tobora mashhur bo‘lib bormoqda.
So‘nggi yillarda O‘zbekiston olma eksporti geografiyasi ham kengaymoqda — endilikda nafaqat qo‘shni davlatlar, balki Yaqin Sharq mamlakatlaridan ham so‘rovlar ko‘paygan. Mutaxassislar bu jarayonni “qishloq xo‘jaligi eksportining yangi to‘lqini” deb atamoqda.
“Zamin”ni Telegramʻda oʻqing!
