Markaziy bank 2026 yil yanvar oyi holatiga inflyatsiya ko‘rsatkichlarini e’lon qildi. Raqamlar shundan dalolat beryaptiki, umumiy yillik inflyatsiya oxirgi yillarda bosqichma-bosqich pasayish tomon yo‘l olgan, ammo ayrim tovar va xizmatlarda narx “sakrashi” hali ham bor.
Umumiy inflyatsiya dinamikasi
Ma’lumotlarga ko‘ra, umumiy yillik inflyatsiya 2022 yilda 12,3 foiz bo‘lgan. 2023 yilda 8,8 foizga tushgan, 2024 yilda 9,8 foizgacha ko‘tarilgan, 2025 yilda esa 7,3 foizga qadar pasaygan. 2026 yil yanvar oyi holatiga bu ko‘rsatkich yana bir oz tushib, 7,2 foiz bo‘ldi.
Oziq-ovqat narxlari kimdandir “ketdi”, kimgadir “keldi”
Infografikaga ko‘ra, ba’zi mahsulotlar ancha arzonlashgan, boshqalari esa sezilarli qimmatlagan.
Yillik hisobda eng ko‘p arzonlashganlar:
- Qovoq: -57,9 foiz
- Baqlajon: -30,5 foiz
- Tarvuz: -27,9 foiz
- Shaftoli: -24,5 foiz
- Sarimsoq: -21,1 foiz
Yillik hisobda eng ko‘p qimmatlaganlar:
- Limon: +90,8 foiz
- Karam: +27,9 foiz
- Qo‘y go‘shti: +27,2 foiz
- Suyaksiz mol go‘shti: +25 foiz
- Suyakli mol go‘shti: +23,8 foiz
Shu bilan birga, iste’mol narxlari indeksi savatidagi 167 turdagi oziq-ovqat mahsulotlaridan 147 tasi (88 foiz) bo‘yicha yillik narx o‘sishi 10 foizdan past bo‘lgani qayd etilgan.
Avvalroq prezident boshchiligidagi yig‘ilishda yanvar oyida inflyatsiyaning 45 foizi oziq-ovqat mahsulotlari hisobiga, ayniqsa 13 foizi go‘sht hisobiga to‘g‘ri kelgani urg‘u qilingan. Shu nuqtada go‘shtda importga qaramlikni kamaytirish uchun ozuqa masalasini hal qilish kerakligi ta’kidlangan.
Nooziq-ovqat tovarlarda ham ikki xil manzara
Nooziq-ovqat mahsulotlaridan ayrimlarida narx biroz tushgan:
- Yirik oshxona priborlari: -2,9 foiz
- Kichik maishiy priborlar: -1 foiz
- A4 qog‘oz: -0,9 foiz
Biroq global bozorda oltin rekord darajada qimmatlagani zargarlik buyumlariga ham ta’sir qilgan: nikoh uzugi 32,6 foizga qimmatlagan.
Shuningdek, ayrim pozitsiyalarda keskin oshish kuzatilgan:
- Metan: +30,2 foiz
- Gazeta: +17,5 foiz
- Propan: +12,3 foiz
- Sement: +12,2 foiz
Iste’mol narxlari indeksidagi 252 turdagi nooziq-ovqat mahsulotlarining 232 tasi (92 foiz) bo‘yicha yillik narx o‘sishi 10 foizdan kam bo‘lgan.
Xizmatlar bo‘yicha eng katta shok sug‘urtada
Xizmatlar yo‘nalishida ham qiziq holatlar bor. Yillik hisobda:
- Pul o‘tkazmalari uchun haq to‘lash: -7,5 foizga arzonlashgan
- Nodavlat OTMda o‘qish: -0,5 foizga arzonlashgan
Eng ko‘p qimmatlagan xizmat esa shaxsiy transport vositalarini sug‘urtalash bo‘lgan: 281,8 foizga oshgan. Shuningdek, quyidagi xizmatlarda ham keskin qimmatlashish qayd etilgan:
- Trolleybusda yo‘l haqi: +100 foiz
- Ichki yo‘lovchi havo transporti: +55,9 foiz
- Haydovchilik kurslari: +48,5 foiz
- Tarmoq gaz: +39,2 foiz
Iste’mol narxlari indeksidagi 98 turdagi xizmatlarning 66 tasi (67 foiz) bo‘yicha yillik narx o‘sishi 10 foizdan past bo‘lgan.
Qisqa xulosa
Umumiy inflyatsiya pasaygani yaxshi signal, lekin oddiy xaridor uchun “his” narxlar to‘plamida bilinadi: kimdir sabzavotda yengil tortdi, kimdir limon, go‘sht yoki sug‘urtada qattiqroq to‘ladi. Endi asosiy masala — oziq-ovqat, ayniqsa go‘sht yo‘nalishidagi bosimni tushirish va xizmatlar segmentidagi keskin sakrashlarni nazoratga olish. Ha, iqtisodiyot “tinch” emas, lekin yo‘nalish to‘g‘ri bo‘lsa, narxlar ham bir payt “hushiga keladi”.
“Zamin”ni Telegramʻda oʻqing!
