12:08 / 18.12.2014
7 125

“Forbes”ning biznes yuritish uchun qulay mamlakatlar reytingida O‘zbekistonga joy topilmadi

“Forbes”ning biznes yuritish uchun qulay mamlakatlar reytingida O‘zbekistonga joy topilmadi
O‘zbekiston “Forbes” jurnali tomonidan tayyorlangan biznes yuritish uchun eng yaxshi mamlakatlar reytingiga kiritilmadi. Reytingning to‘liq ko‘rinishi bilan jurnal saytida tanishish mumkin.

Reytingda mamlakatlar 11 yo‘nalish bo‘yicha tadqiq etilib, o‘rinlarga joylashtirib chiqilgan. Yo‘nalishlar fuqarolarning shaxsiy erkinliklari darajasi, mulk va investisiyalar huquqining himoyalanganligi darajasi, narxlarning barqarorligi, tovar va xizmatlar eksporti va importi yo‘lidagi to‘siqlar bor-yo‘qligi, texnologiyalarning rivojlanganlik darajasi, innovasiyalarning joriy etilishi, davlatning biznesga ta’siri, korrupsiya darajasi, soliq yuki va aksiyalar bozori holatini qamrab olgan.

“Forbes” tanloviga ko‘ra, Daniya jahonda biznes yuritish uchun eng yaxshi mamlakat deb topilgan. Undan keyingi o‘rinlarni Gongkong va Yangi Zelandiya egallagan. O‘tgan yilgi reytingda Irlandiya birinchi bo‘lgandi.

AQSh ushbu reytingda 18-o‘rinni egallagan. Rossiya esa, 146 mamlakat orasida 91-o‘rinda qayd etilgan. Qayd etishlaricha, Rossiya xomashyo eksportiga qat’iy bog‘lanib qolgan, mulk huquqi himoyasi hali ham mukammal emas, xususiy sektorga esa davlat mutassil aralashaveradi.

Reytingda sobiq SSSR respublikalaridan uchtasi – O‘zbekiston, Turkmaniston va Belarus kiritilmagan. Qolgan mamlakatlar orasida esa Boltiqbo‘yi mamlakatlari – Estoniya (reytingda 22-o‘rin), Litva (24-o‘rin) va Latviya (36-o‘rin) peshqadam bo‘lib turibdi.

Sobiq SSSR respublikalari orasida keyingi o‘rinlarni Gruziya (47), Armaniston (56), Qozog‘iston (65), Ozarbayjon (66), Moldova (77), Ukraina (88), Rossiya (91), Qirg‘iziston (101) va Tojikiston (129) joy olgan.

Manba: Kun.uz

Ctrl
Enter
Xato topdIngizmi?
Iborani ajratib Ctrl+Enter tugmasini bosing
Fikrlar (0)


Yangiliklar » Iqtisodiyot » “Forbes”ning biznes yuritish uchun qulay mamlakatlar reytingida O‘zbekistonga joy topilmadi
[/banner_pushhouse