Toshkentda havo ifloslanishini nazorat qiluvchi yana uchta avtomatik stantsiya oʻrnatildi

^{Foto: Telegram / zaminfoundation}
Toshkentda havo ifloslanishini nazorat qiluvchi uchta yangi avtomatik stantsiya ishga tushirildi. Ular Zamin jamgʻarmasi va Oʻzgidromet agentligining «Atmosfera havosi ifloslanishi monitoringini avtomatlashtirish» qoʻshma loyihasi doirasida oʻrnatildi.

Jamgʻarma matbuot xizmati xabariga koʻra, Oʻzbekistonda loyiha boshlanganidan buyon monitoring.meteo.uz milliy platformasining yagona ma'lumotlar bazasiga 19 ta avtomatik stantsiya ulangan.

Ushbu saytda ular binafsha rangda, uchta yangi esa toʻq yashil rangda belgilangan. Xususan, bittasi «Uch qahramon» posti hududida, ikkinchisi «Zenit» zavodi hududida va uchinchisi «Yangi Oʻzbekiston» bogʻi yonida oʻrnatildi.

Stantsiyalar shunchaki detektor yoki datchiklar emas, balki havo ifloslanishini monitoring qilish uchun toʻliq jihozlangan laboratoriyalar hisoblanadi.

Horiba (Yaponiya/Germaniya) ishlab chiqargan ushbu stantsiyalar etalon sifatida tan olingan boʻlib, ular Finlandiya meteorologik instituti kabi etakchi tashkilotlar tomonidan oʻz oʻlchov uskunalarini sozlash uchun qoʻllaniladi.
“Zamin” yangiliklarini “Instagram”da kuzatib boring