Toshkentda ona tomonidan kaltaklangan 4 yoshli qizcha vafot etdi

Toshkent viloyatining Boʻstonliq tumanida ona tomonidan kaltaklangan 4 yoshli qizaloq vafot etdi, deb xabar berdi "Gazeta.uz".

23-dekabr kuni Boʻstonliq tumanidagi tibbiyot birlashmasiga turli jarohatlari bilan yetkazilgan Y.M. ismli qizchani 47 yoshli onasi E.Y. tomonidan shafqatsiz kaltaklangani aniqlandi. Qizchaning bosh miyasi qattiq shikastlangan, yopiq bosh jarohatlari va boshqa ogʻir tan jarohatlari qayd etilgan.

27-dekabrda Chirchiq shahar IIB tomonidan ona ustidan Jinoyat kodeksining 126-1-moddasi 7-qismi “b” bandi boʻyicha (Voyaga yetmaganlarga nisbatan uy sharoitida qasddan ogʻir tan jarohati yetkazish) jinoyat ishi qoʻzgʻatildi.

Shifokorlarning ikki haftalik sa'y-harakatlariga qaramay, qizaloq 7-yanvar kuni vafot etdi. Natijada jinoyat ishini qayta malakalash rejalashtirilmoqda, deya ma'lum qildi bolalar ombudsmani matbuot xizmati. Ushbu oʻzgarish jinoyatga nisbatan qattiqroq jazo tayinlanishini koʻzda tutadi.

Eslatib oʻtamiz, 2024-yil oktyabridan boshlab Oʻzbekistonda bolalarni uy zoʻravonligidan himoya qilish boʻyicha yangi qonunlar kuchga kirgan edi.