Jizzaxda oʻqituvchilar firibgarlik qurboni boʻlishdi

Jizzax viloyati IIB matbuot xizmati ma'lumotiga koʻra, internet-firibgar qoʻlga olindi.

Bir necha umumta'lim maktablari oʻqituvchilari huquqni muhofaza qilish organlariga murojaat qilib, firibgarlik qurboni boʻlganliklari haqida xabar berishdi. Jabrlanuvchilarga oʻqituvchilar uchun oʻtkaziladigan tanlovda ishtirok etish taklif qilingan. Tanlovda gʻoliblarga 30, 20 va 10 million soʻmlik pul mukofotlari va'da qilingan. Ushbu tanlov haqidagi ma'lumot maxsus yaratilgan Telegram-kanalda e'lon qilingan.

Jabrlanuvchilar tanlov shartlarini bajarib, dars jarayonlarini aks ettirgan videolarni firibgarga yuborishgan. Firibgar ular tanlovga mos kelishi haqida aytgan va qatnashish uchun toʻlov qilishni soʻragan. Shu tariqa, jabrlanuvchilardan biri firibgarga dastlab 2 million, soʻngra yana 2,3 million soʻm yuborgan. Firibgar ikkinchi toʻlovni olgach, oʻqituvchini televideniyeda chiqishiga yordam berishni va'da qilgan.

Oʻtkazilgan tezkor tadbirlar natijasida ushbu jinoyatda Qashqadaryo viloyati Mirishkor tumanida yashovchi shaxs aybdor ekanligi aniqlangan. Unga nisbatan jinoyat ishi qoʻzgʻatilgan. “Zamin” yangiliklarini “Telegram”da kuzatib boring