Ekoturizm: tabiatdan bahra olib, o‘ziga g‘amxo‘r bo‘laylik!

O‘zbekistonda turizmning barcha yo‘nalishlari qatorida ekoturizm so‘nggi yillarda jadal rivojlanmoqda. Mamlakatimizning betakror tabiiy manzaralari, ulkan tog‘ tizmalari va biologik boyliklari nafaqat mahalliy, balki xorijiy sayyohlarni ham o‘ziga jalb qilmoqda.

Ekoturizmning global ahamiyati

BMTning Butunjahon Turizm Tashkiloti (UNWTO) ma’lumotlariga ko‘ra, hozirgi kunda ekoturizm jahon turizm bozorining 7 foizini tashkil etadi va yil sayin bu ulush ortib bormoqda. O‘zbekistondagi Zarafshon, Hisor, Ugom-Chotqol, Surxon tog‘ tizmalari hamda Qizilqum va boshqa hududlar bu yo‘nalish uchun katta salohiyatga ega.

Mavsum boshlandi, mas’uliyatchi kim?

Kunlar isishi bilan ko‘plab fuqarolar tabiat bag‘riga dam olish uchun chiqadi. Ammo afsuski, ko‘p hollarda ortimizdan turli chiqindilar qoldiramiz. Bu chiqindilar — ayniqsa plastik, shisha va boshqa biologik tarkibga ega bo‘lmagan mahsulotlar — uzoq yillar davomida chirimay, atrof-muhitga jiddiy zarar yetkazadi. Natijada tabiat insonning lahzaviy hordig‘i qurboniga aylanadi.

Ekoturizm — faqat sayr emas, balki mas’uliyat ham

Xalqaro tabiatni muhofaza qilish ittifoqi (IUCN) ekoturizmni quyidagicha ta’riflaydi:

“Ekoturizm — bu tabiiy hududlarga mas’uliyatli sayohat bo‘lib, u atrof-muhitni muhofaza qilish va mahalliy aholi farovonligini yaxshilashga xizmat qiladi.”

Ekoturizmdagi asosiy tamoyillar shunday:
- tabiat va ekologik muvozanatni asrash;
- mahalliy aholi bilan hamkorlik qilish;
- madaniy va tabiiy merosga ehtirom;
- barqaror rivojlanishga hissa qo‘shish.

Faqat sayyoh emas, tabiatning bir bo‘lagimiz

Har safar dam olishga chiqqanimizda, o‘zimizni shunchaki tomoshabin emas, balki tabiatning ajralmas bir bo‘lagi sifatida his qilishimiz lozim. Tabiatni himoya qilish nafaqat kelgusi avlod, balki o‘z hayotimiz uchun ham javobgarligimizni ifoda etadi.

Zamin.uz tahririyatidan:
Ekoturizm bu — faqat yo‘lga chiqish emas, balki o‘z madaniyatimizni, insoniylik mas’uliyatini ham namoyon qilishdir. Keling, tabiatga mehr bilan qarab, hordiqni foydaga aylantiraylik! “Zamin”ni Telegramʻda oʻqing!