Toshkentda shamol bir inson hayotiga zomin bo‘ldi

23 may kuni Toshkentda kuchli shamol oqibatida daraxt ikki kishining ustiga quladi, deb Nova24.uz xabar berdi. Hodisa natijasida fuqarolardan biri halok bo‘ldi.

Tibbiyot xodimi Murod Qodirovning so‘zlariga ko‘ra, jarohat olgan bemorlardan biri shifoxonaning qabulxonasida vafot etgan.

Ikkinchi fuqaro og‘ir jarohat bilan shifoxonaga yetkazilgan. Uning bosh miyasida jiddiy shikast aniqlangan va uzoq davom etgan operatsiyadan so‘ng reanimatsiyada og‘ir ahvolda qolmoqda.

Ma’lumot uchun, 23 may kuni Toshkentda yana kuchli changli bo‘ron kuzatilgan. Mutasaddilar aholiga ehtiyot bo‘lishni va avtomobillarni daraxtlar ostida qoldirmaslikni tavsiya qilgan edi.