Buxoroda 978 dona noqonuniy dori topildi

Ichki xavfsizlik xizmati matbuot xizmatiga ko‘ra, Buxoroda qalbaki va ruxsatsiz dorilar bilan bog‘liq jinoyat ishi ochildi.
Ichki xavfsizlik xizmati va bojxona boshqarmasi hamkorligida o‘tkazilgan tekshiruvda Buxoro tumanida yashovchi, 1985 yilda tug‘ilgan shaxsning uyi va avtomobilidan 978 dona hujjatsiz va kelib chiqishi noma’lum turli dorilar aniqlanib olib qo‘yildi.

Dorilar orasida Imudon, Tserobrolizin, Dofamin, Maalox va yana 78 xil dori borligi ma’lum qilindi. Gumondor ushbu ishda unga 1962 yilda tug‘ilgan jinoyat sherigi yordam berganini tan oldi.

Sog‘liqni saqlash vazirligining Farmatsevtik mahsulotlar xavfsizligi markazi xulosasiga ko‘ra, dorilarning 32 tasi davlat reyestrida ro‘yxatga olinmagan, 57 tasida moslik sertifikati yo‘q, 6 tasi sifatsiz va 4 tasi qalbaki deb topilgan. Bundan tashqari, dorilar saqlash qoidalariga zid tarzda saqlangan.

Mazkur holat yuzasidan Jinoyat kodeksining 243-moddasi 3-qismiga asosan jinoyat ishi qo‘zg‘atilgan. Dorilar Buxoro shahri hamda Shofirkon, Peshku va Romitan tumanlarida sotilgan. “Zamin”ni Telegramʻda oʻqing!