So‘nggi kunlarda ijtimoiy tarmoqlardagi muhokamalar markazida davlat maktabgacha ta’lim muassasalarida bolalar uchun tashkil etilayotgan ovqat sifati bo‘ldi. Ayniqsa, ayrim bog‘chalarda mahsulotlar me’yorlarga javob bermasligi haqidagi shikoyatlar ko‘pchilikning e’tiborini tortdi, deb xabar berdi MDSHO.
29 iyul kuni bir qancha foydalanuvchilar bog‘chalarda berilgan ovqat tarkibi, miqdori va sifatidan norozilik bildirgan postlar bilan chiqishdi. Bu masala jamoatchilik o‘rtasida qaynoq muhokamalarga sabab bo‘ldi.
Maktabgacha ta’lim sohasida ovqatlanishni nazorat qilish boshqarmasi mazkur holatlarga munosabat bildirib, murojaat kelib tushgan muassasalar tekshirib chiqilganini ma’lum qildi.
Birinchisi — Toshkent viloyati Qibray tumanida joylashgan 42-sonli bog‘chada 27 fevral kuni aniqlangan holat. Bu yerda bolalarga berilgan go‘sht miqdori yetarli emasligi haqida shikoyat qilingan. Ammo MDHM ma’lum qilishicha, sanitariya talablariga muvofiq, birinchi taom sifatida suyak suvi asosida tayyorlangan sho‘rva taklif etilgan va bolalar to‘liq ovqatlanishni ikkinchi taom orqali ham olgan.
Tegishli ishchi menyu, sanitariya hujjatlari va kundalik ovqatlanish me’yorlari buni tasdiqlagan. Hech qanday cheklanganlik yoki xavfsizlikka zid holat kuzatilmagan.
Ikkinchi holat Qoraqalpog‘iston Respublikasining Chimboy tumanida 23 iyul kuni 22-sonli bog‘chada qayd etildi. Bu yerda ovqat mahsulotlarini yashirincha saqlash holatiga duch kelindi. Mutaxassislar bu holatni tasdiqladi va hozirda tegishli hujjatlar rasmiylashtirilmoqda. Mas’ul shaxslarga nisbatan qat’iy choralar ko‘rilishi ma’lum qilindi.
Eslatib o‘tamiz, 2025 yil boshida Vazirlar Mahkamasi tomonidan davlat bog‘chalarida bolalar sog‘lom ovqatlanishini ta’minlashga qaratilgan maxsus qaror qabul qilingan edi.
Shundan kelib chiqib, bog‘chalar bosqichma-bosqich autsorsing asosida ovqatlanish tizimiga o‘tmoqda. Bu orqali bolalar uchun xavfsiz va to‘liq ratsion shakllantirish, sanitariya talablariga rioya qilish, mahsulotlarni tayyorlash, tashish va saqlash jarayonlarini takomillashtirish ko‘zda tutilgan.
Ushbu maqsadlarni amalga oshirish uchun Ta’lim sohasida ovqatlanishni tashkil etish va nazorat qilish markazi faoliyat yuritmoqda. Markaz nafaqat jarayonlarni muvofiqlashtiradi, balki raqamlashtirish, davlat xaridlarini amalga oshirish va autsorserlar faoliyati ustidan nazoratni ham ta’minlaydi.
Vazirlik tomonidan jamoatchilik nazorati alohida muhim ekani alohida ta’kidlandi. Jurnalistlar, blogerlar va faol foydalanuvchilardan xolis va asosli ma’lumotlarni tarqatish, tekshirishni talab qiluvchi holatlar yuzasidan to‘g‘ridan to‘g‘ri “Ishonch telefoni” (71-202-09-09) yoki Axborot xizmatiga murojaat qilish so‘raldi.
Har bir bola to‘g‘ri va to‘yimli ovqatlanish huquqiga ega. Bunday shikoyatlar jamiyat va mas’ul idoralar hamkorligida hal qilinishi, tizimdagi kamchiliklar bartaraf etilishi uchun muhim turtki bo‘lishi kerak.
Fuqarolarning fikri va kuzatuvlari, rasmiy organlarning pozitsiyasi bilan birgalikda, bu sohadagi shaffoflikni ta’minlashning eng samarali yo‘lidir.
Ta’lim va bolalar sog‘lig‘i – bu davlat uchun ustuvor masala, deb ta’kidlandi rasmiy bayonotda.
“Zamin”ni Telegramʻda oʻqing!
