Andijon viloyatida jamoatchilik e’tiborini tortayotgan yana bir hodisa qayd etildi. Marhamat tumanida joylashgan 42-maktabda o‘qituvchilarni majburiy ravishda ta’mirlash ishlariga jalb etgan direktor lavozimidan ozod etildi, u endi nafaqat ishsiz, balki katta jarimaga ham yuz tutadi.
Mehnat inspeksiyasi ma’lumotlariga ko‘ra, ushbu ta’lim muassasasining rahbari Z.Mamajonova pedagoglarni ta’mirlash ishlariga majburan jalb qilgan. Qaysi asosda, deb so‘raysizmi? Aynan tahdid orqali — “ishlashni xohlamasangiz, dars soatlaringiz kamaytiriladi”, degan.
Inspeksiya 4 avgust kuni o‘rganuv ishlarini olib bordi va natijada sobiq direktorga 41 million 200 ming so‘m miqdoridagi jarima tayinlandi. Bu jarima Ma’muriy javobgarlik to‘g‘risidagi kodeksning 51-moddasi 2-qismiga asosan belgilangan. Mazkur moddaga ko‘ra, o‘qituvchilarni majburiy mehnatga jalb qilganlik uchun BHMning 100 baravarigacha jarima jazosi ko‘zda tutilgan.
Ayni vaqtda maktabning sobiq direktori endi lavozimda emas. Boshqarma vakillarining ta’kidlashicha, o‘qituvchilar bilan suhbat chog‘ida ta’mirlash ishlari “ixtiyoriy” bo‘lganini bildirishgan. Ammo rahbar o‘z zimmasidagi mas’uliyatni bajarmagani uchun lavozimidan ozod etilgan.
Hodisa ijtimoiy tarmoqlarda ham keng muhokamalarga sabab bo‘ldi. 2 avgustda tasvirga olingan videolar 3 avgust kuni tarqalib, jamoatchilikning keskin e’tiroziga sabab bo‘ldi.
Endilikda savol tug‘iladi: maktab rahbarlari ta’limning sifatini oshirish bilan emas, devor bo‘yash, pol yuvish, oyna tozalash kabi ishlarga ustozlarni majburlash bilan bandmi?
Har qanday holatda ham ustozlar sha’niga dog‘ tushiruvchi, ularni mehnat huquqlaridan mahrum qiluvchi holatlarga nisbatan murosasiz yondashish — ta’lim tizimida ochiqlik va adolatni ta’minlashda muhim qadam hisoblanadi.
“Zamin”ni Telegramʻda oʻqing!
