Turkiyada yuqori maoshli ish va’dasiga ishonib, og‘ir vaziyatga tushib qolgan o‘zbekistonlik ayol sog‘-salomat holda Vatanga qaytarildi. Bu haqda O‘zbekistonning Istanbuldagi Bosh konsulxonasi ma’lum qildi.
Ma’lumotlarga ko‘ra, Samarqand viloyatidan bo‘lgan mazkur fuqaro oilaviy nizolardan qochish va yangi hayot boshlash umidi bilan Turkiyaga yo‘l olgan. U ijtimoiy tarmoqlarda o‘zini muvaffaqiyatli tadbirkor sifatida tanishtirgan erkakning shirin va’dalariga ishongan. Unga “malakang yoki til bilishing shart emas, yuqori maoshli ish topib beramiz” degan va’da qilingan. Biroq haqiqat boshqacha chiqdi.
Ayol ishchi vizasisiz olib kirilgan va yo‘l xarajatlarini qaytarish bahonasida uning pasporti olib qo‘yilgan. Keyinchalik esa og‘ir sharoitlarda ishlashga majburlashga urinilgan. Bu holatdan chiqish uchun u O‘zbekistonning Istanbuldagi Bosh konsulxonasiga yordam so‘rab murojaat qildi.
Diplomatik vakolatxona va Migratsiya agentligining Turkiyadagi vakilligi tezkorlik bilan harakatga o‘tib, fuqaroni qutqarish choralarini ko‘rdi. Natijada o‘zbekistonlik ayol sog‘-omon Vatanga qaytarildi. Shu bilan birga, uni aldashga uringan shaxs haqidagi ma’lumot Turkiya huquqni muhofaza qiluvchi organlariga topshirildi.
Bosh konsulxona o‘z murojaatida vatandoshlarga jiddiy ogohlantirish yo‘lladi:
“Aziz fuqarolar! Xorijdagi 'oson pul' va yolg‘on va’dalarga ishonmang. Bunday xavfli yo‘l hayotingizni va salomatligingizni xavf ostiga qo‘yadi. Yaqinlaringiz qadriga yeting va muammolaringizni faqat qonuniy yo‘l bilan hal etishga harakat qiling”.
Bu voqea yana bir bor odam savdosi va yolg‘on va’dalar orqali chet elga ishga yuborish kabi holatlar qanchalik xavfli ekanini ko‘rsatmoqda. Mutaxassislar eslatishicha, xorijda ishlashni istagan har bir fuqaro faqat rasmiy agentliklar orqali, qonuniy yo‘l bilan ishga joylashishi zarur.
“Zamin”ni Telegramʻda oʻqing!
