Poytaxtda savdo markazi avtoturarg‘ohida voyaga yetmagan shaxs Malibu rusumli avtomobilni haydayotgan videolavha ijtimoiy tarmoqlarda katta muhokamaga sabab bo‘ldi. Yo‘l harakati xavfsizligi davlat inspeksiyasi ushbu holat yuzasidan rasmiy izoh berdi.
Ma’lumotlarga ko‘ra, voqea Chilonzor tumanidagi Bunyodkor shoh ko‘chasida sodir bo‘lgan. Avvalroq tarqalgan videoda bola avtoturarg‘ohda avtomobilni boshqarayotgani aks etgan.
Huquq-tartibot organlari xodimlari holatni o‘rganib, bolaning shaxsini aniqladi. Shundan so‘ng u va uning ota-onasi profilaktik suhbat hamda protsessual choralar ko‘rish uchun chaqirildi.
Tekshiruv natijasida bolaning otasiga nisbatan ma’muriy bayonnoma rasmiylashtirildi. Unga bolalarni tarbiyalash va nazorat qilish majburiyatlarini bajarmagani uchun Ma’muriy javobgarlik to‘g‘risidagi kodeksning 47-moddasi asosida chora ko‘rildi.
Mutasaddilar aholini yana bir bor ogohlantirib, nobalog‘onlarning avtomobil boshqarishi nafaqat qonunbuzarlik, balki hayot uchun jiddiy xavf tug‘dirishini ta’kidlashdi. Shu bois ota-onalar farzandlari ustidan qat’iy nazorat o‘rnatishi lozimligi qayd etildi.
“Zamin”ni Telegramʻda oʻqing!
