Toshkent shahrida bir ota o‘z uch nafar farzandi uchun oldindan rekord miqdorda – 150 ming AQSH dollari aliment to‘ladi. Mazkur holat haqida Majburiy ijro byurosining Toshkent shahar boshqarmasi xabar berdi.
Ma’lum qilinganidek, Uchtepa tuman bo‘limiga Fuqarolik ishlari bo‘yicha Uchtepa tumanlararo sudining 2018 yil 17 may va 2022 yil 20 apreldagi sud qarorlariga asosan aliment to‘lash bo‘yicha ijro hujjati kelib tushgan. Unga ko‘ra, qarzdor B.T.dan undiruvchi B.G. foydasiga 3 nafar farzand voyaga yetguniga qadar har oyda ota ish haqi va boshqa daromadlarining 1/3 qismi miqdorida aliment undirilishi ko‘rsatilgan.
Ijro byurosi tomonidan ish qo‘zg‘atilgan va tomonlarga yuborilgan. Olib borilgan ijro harakatlari davomida ota tomonidan ariza kelib tushgan: u voyaga yetmagan farzandlari uchun alimentni oldindan hisoblab berishni so‘ragan. Bu talab O‘zbekiston Respublikasi Oila kodeksining 145-moddasi hamda Vazirlar Mahkamasining 2018 yil 10 iyundagi 808-sonli qaroriga asoslanib amalga oshirildi.
Hisob-kitoblarga ko‘ra, 2025 yil 1 iyuldan 2040 yil 2 fevralga qadar oldindan to‘lanishi lozim bo‘lgan aliment umumiy 1 mlrd 847 mln 413 ming 73 so‘mni tashkil qilar edi. Bu esa nafaqat rekord miqdordagi to‘lov, balki ota farzandlari ta’minotida mas’uliyatlilik va mas’uliyatni yanada ko‘rsatadi.
Natijada, 29 avgust kuni ota tomonidan 150 ming AQSH dollari ko‘rinishidagi aliment mablag‘i undiruvchi foydasiga to‘lab berildi. Mazkur ijro ishi rasman yakunlandi va bunday holat yurtimizdagi aliment to‘lovlarida yangi rekord sifatida qayd etildi.
Bu voqea yana bir bor ota va farzand o‘rtasidagi ijtimoiy va moliyaviy mas’uliyatning ahamiyatini eslatib, huquqiy mexanizmlar orqali farzandlar hayotida barqaror va ishonchli ta’minotni ta’minlashning muhimligini namoyon qiladi.
“Zamin”ni Telegramʻda oʻqing!
