Toshkentda haydovchi N.Yu. nomi bilan bog‘liq holat jamoatchilikda katta qiziqish uyg‘otdi. Unga nisbatan Majburiy ijro byurosi Toshkent shahar boshqarmasi tomonidan jami 370 ta ijro hujjati ish yurituvga olingani ma’lum qilindi. Ushbu hujjatlarning umumiy qiymati 328,7 million so‘mni tashkil etmoqda.
Ma’lumotlarga ko‘ra, qarzdor fuqaroning asosiy muammosi — yo‘l harakati qoidalarini qayta-qayta buzishi. Aniqlanishicha, 2024–2025 yillar davomida u o‘zining “JETOUR” rusumli avtomobilida 354 marotaba qoidabuzarlik sodir etgan va natijada 258,7 million so‘mlik ma’muriy jarima to‘plangan. Biroq u jarimalarni to‘lashga biror marta ham harakat qilmagan.
Bundan tashqari, hujjatlar orasida 14 ta soliq qarzlari bo‘lib, ularning umumiy qiymati 51,8 million so‘mga yetgan. Shuningdek, “Mikrokreditbank” ATB foydasiga 18,2 million so‘m kredit qarzini undirish yuzasidan ham ikki ijro hujjati kelib tushgan.
Tekshiruv jarayonida ma’lum bo‘lishicha, haydovchi foydalanayotgan “JETOUR” avtomobili kredit asosida olingan va bank garovi sifatida rasmiylashtirilgan. To‘lovlarning bajarilmagani tufayli bu transport vositasiga nisbatan xatlov chorasi qo‘llanilgan.
Hozirda umumiy miqdori 328,7 million so‘mdan oshgan qarzdorlikni undirish bo‘yicha tegishli ijro harakatlari amalga oshirilmoqda. Mutasaddilar bu holat qoidabuzarlik va to‘lovlarni o‘z vaqtida bajarmaslik qanday og‘ir oqibatlarga olib kelishini yaqqol ko‘rsatishini ta’kidlashdi.
“Zamin”ni Telegramʻda oʻqing!
